ꪹꪮꪥ ꪩꪷ ꪗꪲ ꪨꪱ ꫃ꪥꪒ ꪭꪉꪰ ꪵꪔ ꪫꪀꪸ ꪩꪉꪸ ꪢꪴ

ꪨꪉꪰ ꪋꪲ ꪮꪱꪫ ꪭꪮꪒ 10 ꪜꪲ ꪵꪔꪉ ꪩꪉꪸ ꪢꪴ ꪹꪐ ꪵꪀꪉ ꪢꪴ ꪵꪣ ꪄꪮꪉ ꪋꪺ ꪹꪭꪙ ꪹꪮꪥ ꪩꪷ ꪗꪲ ꪨꪱ ꪢꪉꪰ ꪚꪱꪙ ꪵꪢ ꪗꪲ ꫄ꪊꪙ ꪮꪒꪲ ꪮꪮꪉ ꪭꪫꪙꪸ ꪹꪣꪉ ꪩꪱ ꪔꪉꪲ ꫄ꪎꪙ ꪨꪱ ꪁꪷ ꪁꪒꪳ ꪼꪒ ꪩꪱꪉ ꪒꪲ ꪀꪉꪲ ꫃ꪔ ꪎꪉꪴ ꪕꪱꪀ ꪣꪲ ꪫꪀꪸ ꫃ꪥꪒ ꪵꪀꪉ ꪖꪴ ꫄ꪑꪚ ꪵꪕꪒ ꪕꪉꪸ ꪻꪬ ꪨꪱꪤ ꪹꪮꪥ ꪙꪮꪉ ꪠꪴ ꪑꪉꪲ.

ꪹꪮꪥ ꪨꪱ ꪐꪽ ꪵꪥꪉ ꪵꪔꪉ ꪩꪉꪸ ꪎꪒꪰ ꪎꪉꪲ ꪨꪷ ꪩꪺꪉ ꫃ꪥꪒ ꪩꪺꪉ ꪼꪜ ꪋꪮꪚ ꪵꪣꪙ, ꪹꪮꪥ ꪨꪱ ꪁꪷ ꪤꪮꪣ ꪮꪮꪀ 800 ꪋꪫꪸ ꪢꪽ ꪼꪫ ꪼꪎ ꪁꪮꪀ ꫄ꪛꪉ ꪵꪔꪉ ꪩꪉꪸ ꪢꪴ. ꪹꪣ ꪵꪅꪫꪀ ꪹꪮꪥ ꪩꪉꪸ ꪢꪴ ꪒꪸ ꪹꪠꪉ ꪬꪱꪀ ꪫꪱ ꪩꪉꪸ ꪕꪮꪥ ꪩꪺꪉ ꪎꪉꪰ ꪢꪉꪰ ꪁꪮꪀ ꫄ꪛꪉ ꪹꪚꪱ ꪁꪒꪳ ꪼꪒ ꪩꪱꪉ ꪒꪲ ꪀꪉꪲ ꫃ꪔ ꪎꪉꪴ. ꪹꪮꪥ ꪑꪱꪥ ꪣꪱ ꪩꪉꪸ ꪢꪴ ꪣꪱꪀ ꪹꪐ ꪵꪔ ꪜꪲ 2011 ꪹꪕꪱ ꪭꪮꪒ ꪼꪅ. ꪀꪚꪾ 15 ꪶꪔ ꪢꪴ ꪵꪣ ꪵꪀꪉ 70 ꪶꪔ ꪢꪴ ꪹꪐ ꪢꪮꪥ ꪜꪲ ꪋꪺ ꪹꪭꪙ ꪹꪮꪥ ꪄꪱꪤ ꪭꪱꪉ ꪭꪮꪥ ꪶꪔ ꪢꪴ ꪹꪋ ꪵꪀꪉ ꪭꪱꪉ ꪎꪚꪲ ꫄ꪔꪙ ꪢꪴ ꪹꪐ. ꪏꪲ ꪎꪸ ꫄ꪉꪙ ꪶꪀꪀ ꪑꪉꪰ ꪼꪒ ꪢꪱ ꪤꪱꪫ 300 ꪋꪫꪸ ꪢꪽ.

          ꪕꪮꪥ ꪹꪮꪥ ꪨꪱ ꪢꪱ ꪵꪝ ꪝꪉꪳ ꪢꪴ ꪹꪚꪱ ꪥꪱꪀ ꪬꪱꪀ ꪫꪱ ꪵꪔꪉ ꪩꪉꪸ ꪵꪣꪙ ꪀꪲ ꪗꪺꪒ. ꪶꪀꪀ ꪵꪅꪫꪀ ꪼꪒ ꪣꪲ ꪹꪋꪉ ꪀꪙꪲ ꪒꪲ, ꪖꪳ ꪎꪮꪉ ꪼ ꪒꪢꪲ ꪁꪮꪀ ꫄ꪛꪉ ꪵꪝꪀ ꪻꪎ ꪖꪳ ꪎꪱꪣ ꪼꪒ ꪋꪳ ꪡꪮꪉ ꫃ꪛꪉ. ꪹꪮꪥ ꪨꪱ ꫄ꪩꪉ ꪋꪮꪥ ꪹꪤ ꪶꪭꪥ ꪪꪙꪸ ꪣꪱ ꪕꪱꪉ ꪶꪔ ꪹꪋ ꪁꪷ ꪹꪏꪉ ꪹꪋꪉ ꪀꪙꪲ ꪎꪒꪰ ꪎꪉꪲ, ꪕꪱꪀ ꪄꪴ ꪉꪱꪥ ꪒꪲ ꪻꪬ ꪹꪮꪥ ꪙꪮꪉ ꪄꪱꪣ ꪄꪮꪥ ꪎꪸ ꪁꪒꪰ ꪁꪉꪴ.

          ꪹꪮꪥ ꪨꪷ ꫛ ꫜ ꪀꪺꪉ ꪶꪎ 11 ꪠꪴ ꪑꪉꪲ ꪶꪝꪙ ꪤꪮꪙ ꪄꪮꪉ ꪔꪉꪲ ꫄ꪎꪙ ꪨꪱ ꪼꪜ ꪶꪋꪣ ꪭꪚꪾ ꪜꪱꪉ ꪶꪭꪥ ꪎꪉꪳ ꪑꪮꪉ ꪠꪴ ꪑꪉꪲ ꫃ꪥꪒ ꪀꪉꪲ ꫃ꪔ ꪤꪮꪥ ꪀꪺꪉ ꪶꪠꪉ ꪼꪔ ꪚꪀꪰ ꪼꪒ ꪶꪔ ꪊꪀꪳ ꪘꪉꪰ ꪔꪉꪲ ꫃ꪉ ꪮꪱꪙ ꪹꪣ ꪹꪚꪙ 6 ꪜꪲ 2016.

                                                                                  ꪵꪖꪉ ꪖꪥꪫꪸ - ꪕꪮꪉ ꪵꪯꪉ ꪥꪀꪲ