Ngon tô thứ 5 mự 25/5/2017

Lý Văn Minh dệt hăng té liệng bẻ

Pì 2011, lằng chơ pày bổ đội táo ma địa phường, ai Lý Văn Minh cọ cằm quyết hựt khửn dệt hăng. Cón nị chăm va mi họt 5 héc ta đìn, hák va chua hươn ai phân lài púk pá, lang đì kình tế báu cựt đảy xùng hính po kìn thồi. Pì 2015, cài bạn phương ai Minh cọ ép đảy kỹ thuật liệng bẻ. Le hền phổng đìn chảu kìn dú phân lài lỏ pá pu, mi lài cò nhả xương nặn ai cọ hằn hư xự chi áo họt 40 tồ bẻ ma liệng. Họt khạy pưng bẻ khòng ai mả pe lài lan, khửn họt 70 tồ. Toi ai Minh vẹt xắư liệng ngua quai hư liệng bẻ đảy mả văn xưa, đọp bẻ báu cận hà lài đìn tẳng lọm , tồ bẻ báu lựa nhả kìn. Mỏi pì chua hươn ai cựt đảy pằn pâng pày cài 200 triệu mằn té khài bẻ nhứa.

Nọk dệt kình tế giỏi té vịa tảnh liệng bẻ, đoàn viền Lý Văn Minh nhăng dòm ngơn cốc liệng quai, liệng mù, cáy cánh púk che cánh đàng khút nòng pói pà. Chảu tồ ai Minh cọ lâng bánh pằn kình nghiệm liệng bẻ cắp po me pi nọng cuồng phổng vạy pọm cằn dệt hăng cánh dòm ngơn cốc xự bẻ chựa hẳư pưng chua hươn pọ dạk cha khòng bản Tà San, choi pi nọng pưng luông dệt luông pày mưa khoẹ, hựt khửn khảm khói xìa cặt cung. Chu cấp bộ đoàn khòng huyện đàng xứp tàm khày quảng pưng ven xanh pộn dỏn vạy choi hẳư đoàn viền thành niền khảm pộn dạk cha, hựt khửn dệt hăng xương ai Minh.

Té pưng luông chóng hanh dám ngắm dám dệt, ai Lý Văn Minh xồm đáng lỏ đoàn viền pộn dỏn, dệt ven xanh hung xiềng vạy đoàn viền thành niền ép năm dệt toi./.

                                                Thanh Thuỷ-Anh dịch

ꪉꪮꪙ ꪶꪕ ꪖꪳ 5 ꪣꪳ 25-5-2017

ꪨꪷ ꪪꪽ ꪢꪉꪲ ꫃ꪥꪒ ꪭꪉꪰ ꪵꪔ ꪵꪔꪉ ꪩꪉꪸ ꪵꪚ

ꪜꪲ 2011 ꪨꪉꪰ ꫄ꪋ ꪼꪜ ꪶꪚ ꪶꪓꪥ ꪔꪱꪫ ꪣꪱ ꪒꪸ ꪹꪠꪉ ꪯꪱꪥ ꪨꪷ ꪪꪽ ꪢꪉꪲ ꪁꪷ ꪀꪣꪾ ꪀꪫꪒꪸ ꪭꪒꪳ ꪄꪙꪳ ꫃ꪥꪒ ꪭꪉꪰ. ꪀꪮꪙ ꪙꪲ ꪋꪣꪾ ꪫꪱ ꪣꪲ ꪭꪮꪒ 5 ꪵꪬꪀ ꪕꪱ ꪒꪙꪲ ꪬꪱꪀ ꪫꪱ ꪋꪺ ꪹꪭꪙ ꪯꪱꪥ ꫄ꪡꪙ ꪨꪱꪥ ꪜꪀꪴ ꪜꪱ ꪩꪱꪉ ꪒꪲ ꪀꪉꪲ ꫃ꪔ ꪹꪚꪱ ꪁꪒꪳ ꪼꪒ ꪎꪉꪴ ꪬꪉꪲ ꪝꪷ ꪀꪙꪲ ꪶꪖꪥ. ꪜꪲ 2015 ꪀꪱꪥ ꪛꪱꪙ ꪹꪡꪉ ꪯꪱꪥ ꪢꪉꪲ ꪵꪮꪚ ꪼꪒ ꪀꪲ ꪗꪺꪒ ꪩꪉꪸ ꪵꪚ. ꪵꪩ  ꫃ꪬꪙ ꪶꪠꪉ ꪒꪙꪲ ꪹꪊꪱ ꪣꪲ ꪨꪱꪥ ꪀꪷ ꪐꪱ ꪹꪏꪉ ꪙꪽ ꪯꪱꪥ ꪁꪷ ꪬꪽ ꪭꪳ ꪏꪳ ꪋꪲ ꪮꪱꪫ ꪭꪮꪒ 40 ꪶꪔ ꪵꪚ ꪣꪱ ꪩꪉꪸ. ꪭꪮꪒ ꪼꪅ ꪝꪉꪳ ꪵꪚ ꪄꪮꪉ ꪯꪱꪥ ꪢꪱ ꪵꪜ ꪨꪱꪤ ꪩꪱꪙ ꪄꪙꪳ ꪭꪮꪒ 70 ꪶꪔ. ꪕꪮꪥ ꪯꪱꪥ ꪢꪉꪲ ꪵꪫꪒ ꪻꪎ ꪩꪉꪸ ꪉꪺ ꪁꪪꪱꪥ ꪭꪳ ꪩꪉꪸ ꪵꪚ ꪢꪱ ꪫꪽ ꪹꪏ ꪒꪮꪚ ꪵꪚ ꪹꪚꪱ ꫄ꪁꪙ ꪨꪱꪥ ꪒꪙꪲ ꫃ꪥꪒ ꪶꪔ ꪵꪚ ꪹꪚꪱ ꪹꪩꪀ ꪐꪱ ꪀꪙꪲ. ꪢꪮꪥ ꪜꪲ ꪋꪺ ꪹꪭꪙ ꪯꪱꪥ ꪁꪒꪳ ꪼꪒ ꪜꪽ ꫄ꪝꪉ ꪼꪜ ꪀꪱꪥ 200 ꪋꪫꪸ ꪢꪽ ꪵꪔ ꪄꪱꪥ ꪵꪚ ꪹꪐ.

ꪙꪮꪀ ꫃ꪥꪒ ꪀꪉꪲ ꫃ꪔ ꪤꪮꪥ ꪵꪔ ꪫꪀꪸ ꪩꪉꪸ ꪵꪚ ꪒꪫꪱꪙ ꪪꪙꪸ ꪨꪷ ꪪꪽ ꪢꪉꪲ ꪑꪉꪰ ꪤꪮꪣ ꫄ꪉꪙ ꪶꪀꪀ ꪩꪉꪸ ꪉꪺ ꪁꪫꪱꪥ ꪩꪉꪸ ꪢꪴ ꪼꪀ ꪵꪀꪉ ꪜꪀꪴ ꪵꪋ ꪵꪀꪉ ꪒꪱꪉ ꪄꪒꪴ ꪘꪮꪉ ꪜꪮꪥ ꪜꪱ. ꪹꪊꪱ ꪶꪔ ꪯꪱꪥ ꪢꪉꪲ ꪁꪷ ꫄ꪩꪉ ꪵꪚꪉ ꪜꪽ ꪀꪉꪲ ꪉꪣꪸ ꪩꪉꪸ ꪵꪚ ꪀꪚꪾ ꪝꪷ ꪵꪣ ꪝꪲ ꪙꪮꪉ ꪀꪺꪉ ꪶꪠꪉ ꪼꪫ ꪝꪮꪣ ꪀꪽ ꫃ꪥꪒ ꪭꪉꪰ ꪵꪀꪉ ꪤꪮꪣ ꫄ꪉꪙ ꪶꪀꪀ ꪏꪳ ꪵꪚ ꪹꪋ ꪻꪬ ꪝꪉꪳ ꪋꪺ ꪹꪭꪙ ꪝꪷ ꪥꪱꪀ ꪋꪱ ꪄꪮꪉ ꪚꪱꪙ ꪔꪱ ꪎꪱꪙ ꪋꪮꪥ ꪝꪲ ꪙꪮꪉ ꪣꪲ ꪩꪺꪉ ꫃ꪥꪒ ꪩꪺꪉ ꪼꪜ ꪹꪣ ꪵꪅꪀ ꪭꪒꪳ ꪄꪙꪳ ꪄꪱꪣ ꪄꪮꪥ ꪎꪸ ꪁꪒꪰ ꪁꪉꪴ. ꪋꪴ ꫄ꪀꪚ ꪶꪚ ꪒꪫꪱꪙ ꪄꪮꪉ ꪭꪫꪙꪸ ꪒꪱꪉ ꪎꪚꪳ ꪔꪱꪣ ꪼꪄ ꪀꪫꪱꪉ ꪝꪉꪳ ꪵꪫꪙ ꪵꪏꪉ ꪶꪝꪙ ꪤꪮꪙ ꪼꪫ ꪋꪮꪥ ꪻꪬ ꪒꪫꪱꪙ ꪪꪙꪸ ꪵꪖꪉ ꪘꪙꪸ ꪄꪱꪣ ꪶꪝꪙ ꪥꪱꪀ ꪋꪱ ꪭꪒꪳ ꪄꪙꪳ ꫃ꪥꪒ ꪭꪉꪰ ꪹꪏꪉ ꪯꪱꪥ ꪢꪉꪲ.

ꪵꪔ ꪝꪉꪳ ꪩꪺꪉ ꪊꪮꪉ ꪵꪭꪉ ꪤꪱꪣ ꪈꪣꪾ ꪤꪱꪣ ꫃ꪥꪒ ꪯꪱꪥ ꪨꪷ ꪪꪽ ꪢꪉꪲ ꪶꪎꪣ ꪒꪱꪉ ꪨꪷ ꪵꪫꪙ ꪵꪏꪉ ꪒꪫꪱꪙ ꪪꪙꪸ ꪶꪝꪙ ꪤꪮꪙ ꪼꪫ ꪒꪫꪱꪙ ꪪꪙꪸ ꪵꪖꪉ ꪘꪙꪸ ꪵꪮꪚ ꪙꪣꪾ ꫃ꪥꪒ ꪕꪮꪥ.

                                      ꪵꪗꪉ ꪖꪫꪥꪲ-ꪕꪮꪉ ꪵꪯꪉ ꪥꪀꪲ