Thường bình Quang Văn Súa dệt kình tế giỏi

           Pì 1967 trai thnàh niền nóm cằm phủ Tay Quang Vằn Súa khửn tang pày bổ đội, tặp xấc nẳng nả trận Mương Lao cánh chuốp chếp bát nẳng mương Lao. Pì 1970 lung đảy phục viền ma dặng toi chế độ thường bình tàng ¾ cánh àu mia tánh hươn là giảo nẳng hươn quề bản Bòng, xã Chiêng Păn, huyện Yền Chầu, tỉnh Sờn La. Nham nặn báu chư hịa chua hươn lung Súa chắng pọ dạk cha, phân lài chu chua hươn pi nọng phủ Tay nẳng nỉ pọm pọ lài dạk cha pưa báu hê mi chựa phăn cò púk bồng tồ tảnh liệng chọp xồm, báu hê hụ xủ khoà học kỹ thuật xắư vịa dệt. Cắp hùa chằư hàn cả dám ngắm dám dệt khòng ai bổ đội Pú Hô, lung khâng chằư xáo hà luông mả khày kình tế hẳư chua hươn chảu. Nọk púk khảu, khảu li, lung Súa pọm cắp lụk mia púk héc ta nưng cò xà cồ, dáo 350 cò mák muông cánh cò nhạn. Pọm cắp vịa nặn lung khút 600 thứak môn nòng liệng pà, liệng 6 tồ mù me vạy khài mù nọi cánh pưng pết cáy hán, nan khòng chua hươn lung chơ đằư cọ mi kỷ họi tồ, tênh vạy khài mi thù nhập tênh vạy piến căm kìn hạng mự. Tênh dệt tênh thót ók kình nghiệm, luông dệt kình tế khòng chua hươn lung thù nhập pằn pâng pày mỏi pì đảy dáo 400 triệu mằn. Pì nị, mák muông Yền Chầu cọ đảy khài pày mương Úc, ặn cọ men khù muôn luông hòm hẳư côn púk mák muông Yền Chầu, cuồng nặn mi chua hươn lung Súa.

          Báu xuốn to dệt hăng hẳư chua hươn chảu lạ, lẹo lung nhăng họn khâng chị bók po me pi nọng bản khuống luông dệt kình tế xương chua hươn chảu. Chiêng Păn khay nị lỏ xã cốc khoẹ khòng huyện Yền Chầu đảy cồng nhẳn cựt đảy luông pùn bản na mắư cánh số chua hươn cặt khòng xã nhăng cài 9% cuồng tênh mết 1.060 chua hươn dần khòng cá xã.

Lung Quang Vằn Súa cón nị cọ đảy chôm hặp lài nả vịa nẳng cờ sở xương dệt kế toán, Hội viền Cựu chiến bình xã, Bàn liền lạc tó xôn Đoàn 83 Viêng Chằn. Dệt nả vịa xằng lung cọ pếnh khày đảy nết kìn liêm dú khòng ai bộ đội Pú Hô. Khay nị chăm va ké côn lẹo, lụk tảu phằư cọ mả nhắư xùng dao, mi khòng kìn khòng vạy, hák va lung Súa nhăng báu hê é dặng hanh.

          Lung Quang Văn Súa lỏ ven xanh thường bình dệt kình tế giỏi xồm đáng vạy pi nọng lài bón ép năm dệt toi./.

                                      Tòng Đức Anh thực hiện

ꪹꪖꪉ ꪚꪉꪲ ꪁꪫꪱꪉ ꪪꪽ ꪎꪺ ꫃ꪥꪒ ꪀꪉꪲ ꫃ꪔ ꪎꪺꪙ ꪘꪮꪉ ꪜꪴꪀ ꪀꪷ ꪀꪙꪲ ꪢꪱꪀ ꪵꪀꪉ ꪵꪔꪉ ꪩꪉꪸ ꪎꪒꪰ ꪎꪉꪲ

ꪜꪲ 1967 ꪋꪱꪥ ꪵꪖꪉ ꪘꪙꪸ ꪘꪮꪣ ꪠꪴ ꪼꪕ ꪁꪫꪱꪉ ꪪꪽ ꪎꪺ ꪄꪙꪳ ꪕꪱꪉ ꪼꪜ ꪶꪚ ꪶꪓꪥ ꪕꪚꪾ ꫄ꪎꪀ ꪘꪉꪰ ꪘꪱ ꫄ꪋꪙ ꪹꪣꪉ ꪩꪱꪫ ꪵꪀꪉ ꪊꪺꪚ ꫃ꪊꪚ ꪚꪱꪒ ꪘꪉꪰ ꪹꪣꪉ ꪩꪱꪫ. ꪜꪲ 1970 ꪩꪉꪴ ꪼꪒ ꪡꪀꪴ ꪪꪙꪸ ꪣꪱ ꪥꪉꪰ ꪕꪮꪥ ꫃ꪊ ꪶꪓ ꪹꪖꪉ ꪚꪉꪲ ꪔꪱꪉ 3 ꫄ꪡꪙ 4 ꪵꪀꪉ ꪹꪮꪱ ꪣꪸ ꪵꪔꪉ ꪹꪭꪙ ꪨꪱ ꪤꪱꪫ ꪘꪉꪰ ꪹꪭꪙ ꫄ꪀꪫ ꪚꪱꪙ ꪚꪮꪉ ꪎꪱ ꪋꪉꪸ ꪝꪽ ꪭꪫꪙꪸ ꪮꪙꪲ ꪹꪊꪱ ꪔꪉꪲ ꫃ꪎꪙ ꪨꪱ. ꪑꪱꪣ ꪙꪽ ꪹꪚꪱ ꪋꪳ ꪭꪀꪸ ꪋꪺ ꪹꪭꪙ ꪩꪉꪴ ꪎꪺ ꪝꪷ ꪤꪱꪀ ꪋꪱ ꪨꪱ ꪵꪩꪫ ꫄ꪡꪙ ꪨꪱꪥ ꪋꪴ ꪋꪺ ꪹꪭꪙ ꫄ꪤꪙ ꪘꪉꪰ ꪘꪲ ꪝꪮꪣ ꪝꪷ ꪤꪱꪀ ꪋꪱ ꪹꪝ ꪹꪚꪱ ꫃ꪭ ꪣꪲ ꪹꪋ ꪡꪽ ꪀꪷ ꪜꪀꪴ ꪶꪚꪉ ꪶꪔ ꪵꪔꪉ ꪩꪉꪸ ꪋꪮꪪ ꪶꪎꪣ ꪹꪚꪱ ꫃ꪭ ꪭꪴ ꪎꪴ ꪄꪫꪱ ꪭꪮꪀ ꪀꪲ ꪖꪺꪒ ꪻꪎ ꪫꪀꪸ ꫃ꪥꪒ ꪹꪥꪙ. ꪀꪚꪾ ꪬꪺ ꪻꪊ ꪬꪱꪙ ꪀꪱ ꪤꪱꪣ ꪈꪣꪾ ꪤꪱꪣ ꫃ꪥꪒ ꪄꪮꪉ ꪯꪱꪥ ꪶꪚ ꪶꪓꪥ ꪜꪴ ꪶꪭ ꪩꪉꪴ ꫄ꪅꪉ ꪻꪊ ꪎꪱꪫ ꪬꪱ ꪩꪺꪉ ꪢꪱ ꪼꪄ ꪀꪉꪲ ꫃ꪔ ꪻꪬ ꪹꪭꪙ ꪤꪱꪫ ꪹꪊꪱ. ꪙꪮꪀ ꪜꪀꪴ ꪹꪄꪱ ꪩꪲ ꪜꪀꪴ ꪹꪄꪱ ꪩꪉꪴ ꪎꪺ ꪝꪮꪣ ꪀꪚꪾ ꪩꪀꪴ ꪣꪸ ꪜꪀꪴ ꪵꪬꪀ ꪕꪱ ꪀꪷ ꪎꪱ ꪶꪀ ꪤꪱꪫ 350 ꪀꪷ ꪢꪱꪀ ꪣꪺꪉ ꪵꪀꪉ ꪀꪷ ꪢꪱꪀ ꪑꪱꪙ. ꪝꪮꪣ ꪀꪚꪾ ꪫꪀꪸ ꪙꪽ ꪩꪉꪴ ꪄꪒꪴ 600 ꪹꪖꪀ ꪶꪣꪙ ꪘꪮꪉ ꪼꪫ ꪩꪉꪸ ꪜꪱ ꪩꪉꪸ 6 ꪶꪔ ꪢꪴ ꪵꪣ ꪼꪫ ꪄꪱꪥ ꪢꪴ ꪙꪮꪥ ꪝꪉꪳ ꫃ꪜꪒ ꪼꪀ ꪬꪱꪙ ꪙꪱꪙ ꪄꪮꪉ ꪋꪺ ꪹꪭꪙ ꪩꪉꪴ ꫄ꪋ ꪻꪒ ꪁꪷ ꪣꪲ ꪀꪮꪉ ꫃ꪕꪉ 300 ꪶꪔ. ꪩꪺꪉ ꫃ꪥꪒ ꪀꪉꪲ ꫃ꪔ ꪄꪮꪉ ꪋꪺ ꪹꪭꪙ ꪩꪉꪴ ꪖꪴ ꫄ꪑꪚ ꪜꪽ ꫄ꪝꪉ ꪼꪜ ꪢꪮꪥ ꪜꪲ ꪼꪒ ꪤꪱꪫ 400 ꪋꪫꪸ ꪢꪽ. ꪜꪲ ꪙꪲ ꪢꪱꪀ ꪣꪺꪉ ꪮꪙꪸ ꪹꪊꪱ ꪁꪷ ꪼꪒ ꪄꪱꪥ ꪼꪜ ꪹꪣꪉ ꪮꪀꪴ ꪯꪽ ꪁꪷ ꪵꪣꪙ ꪄꪴ ꪣꪺꪙ ꪩꪺꪉ ꪬꪮꪣ ꪶꪒꪥ ꪀꪚꪾ ꫛ ꪜꪀꪴ ꪢꪱꪀ ꪣꪺꪉ ꪮꪙꪸ ꪹꪊꪱ ꪀꪺꪉ ꪙꪽ ꪣꪲ ꪋꪺ ꪹꪭꪙ ꪩꪉꪴ ꪎꪺ.

          ꪹꪚꪱ ꪎꪺꪙ ꪕꪷ ꫃ꪥꪒ ꪭꪉꪰ ꪻꪬ ꪋꪺ ꪹꪭꪙ ꪹꪊꪱ ꪨꪱ ꪵꪩꪫ ꪩꪉꪴ ꪑꪉꪰ ꪭꪮꪙ ꫄ꪅꪉ ꪋꪲ ꪚꪮꪀ ꪝꪷ ꪵꪣ ꪝꪲ ꪙꪮꪉ ꪚꪱꪙ ꪄꪺꪉ ꫃ꪥꪒ ꪕꪮꪥ ꪩꪺꪉ ꫃ꪥꪒ ꪀꪉꪲ ꫃ꪔ ꪄꪮꪉ ꪹꪊꪱ. ꪋꪉꪸ ꪝꪽ ꪼꪅ ꪙꪲ ꪨꪷ ꪭꪫꪙꪸ ꪶꪀꪀ ꪵꪫꪅꪀ ꪄꪮꪉ ꪭꪫꪙꪸ ꪮꪙꪸ ꪹꪊꪱ ꪼꪒ ꪶꪀꪉ ꪐꪽ ꪁꪒꪳ ꪼꪒ ꪩꪺꪉ ꪜꪙꪴ ꪚꪱꪙ ꪙꪱ ꪻꪢ ꪵꪀꪉ ꪶꪎ ꪋꪺ ꪹꪭꪙ ꪁꪒꪰ ꪤꪮꪙ ꪶꪩꪉ ꪑꪉꪽ 9% ꪀꪺꪉ ꫃ꪕꪉ ꫃ꪢꪒ ꪀꪱꪥ ꪝꪽ ꫜ ꪋꪺ ꪹꪭꪙ ꫄ꪤꪙ ꫃ꪕꪉ ꪀꪱ ꪎꪱ.

          ꪩꪉꪴ ꪁꪫꪱꪉ ꪪꪽ ꪎꪺ ꪀꪮꪙ ꪙꪲ ꪁꪷ ꪼꪒ ꪶꪋꪣ ꪭꪚꪾ ꪨꪱꪥ ꪘꪱ ꪫꪀꪸ ꪘꪉꪰ ꫄ꪀ ꫄ꪎ ꪹꪏꪉ ꫃ꪥꪒ ꫃ꪀ ꪔꪫꪱꪙ ꪶꪭꪥ ꪪꪙꪸ ꪁꪫꪲ ꪊꪙꪲ ꪚꪉꪲ ꪎꪱ ꪚꪱꪙ ꪨꪙꪸ ꪩꪱꪀ ꪔꪷ ꪶꪏꪙ ꪒꪫꪱꪙ 83 ꪫꪉꪸ ꪊꪽ…꫃ꪥꪒ ꪘꪱ ꪫꪀꪸ ꪎꪉꪰ ꪩꪉꪴ ꪁꪷ ꫃ꪜꪉ ꪼꪄ ꪼꪒ ꫃ꪘꪒ ꪀꪙꪲ ꪩꪣꪸ ꪤꪴ ꪄꪮꪉ ꪯꪱꪥ ꪶꪚ ꪶꪓꪥ ꪜꪴ ꪶꪭ. ꪼꪅ ꪙꪲ ꪋꪣꪾ ꪫꪱ ꪵꪀ ꫛ ꪵꪩꪫ ꪩꪀꪴ ꪹꪔꪱ ꪼꪠ ꪁꪷ ꪢꪱ ꪻꪐ ꪎꪉꪴ ꪥꪱꪫ ꪣꪲ ꪄꪮꪉ ꪀꪙꪲ ꪄꪮꪉ ꪼꪫ ꪬꪱꪀ ꪫꪱ ꪩꪉꪴ ꪎꪺ ꪑꪉꪰ ꪹꪚꪱ ꫃ꪭ ꪵꪮ ꪥꪉꪰ ꪵꪭꪉ. ꪩꪉꪴ ꪫꪱ ꪹꪊꪱ ꪑꪉꪰ ꪣꪲ ꪹꪭꪉ ꪕꪷ ꪻꪒ ꪨꪷ ꪑꪉꪰ ꪊꪮꪉ ꪵꪭꪉ ꫃ꪥꪒ ꪫꪀꪸ ꪼꪫ ꪻꪬ ꪩꪀꪴ ꪨꪱꪙ ꪵꪮꪚ ꪙꪣꪾ ꫃ꪤꪒ ꪕꪮꪥ.

          ꪩꪉꪴ ꪁꪫꪱꪉ ꪪꪽ ꪎꪺ ꪨꪷ ꪵꪫꪙ ꪵꪏꪉ ꪹꪖꪉ ꪚꪉꪲ ꫃ꪥꪒ ꪀꪉꪲ ꫃ꪔ ꪤꪮꪥ ꪶꪎꪣ ꪒꪱꪉ ꪼꪫ ꪝꪲ ꪙꪮꪉ ꪨꪱꪥ ꪚꪮꪙ ꪵꪮꪚ ꪙꪣꪾ ꫃ꪥꪒ ꪕꪮꪥ.

                                      ꪕꪮꪉ ꪵꪯꪉ ꪵꪔꪣ- ꪕꪮꪉ ꪵꪯꪉ ꪥꪀꪲ