VOV4.Xơ Đăng - Troh hâi lơ 22/11, kong pơlê Lâm Đồng hiăng mơdêk kơxô̆ mơngế pâk trum má 2 vaccine ăm mâu ngế kơpêng 18 hơnăm châ lối 80%. Nôkố Lâm Đồng hiăng klêi pâk lối 1 rơtuh 713 rơpâu 851 trum vaccine mơdât COVID-19 ăm kuăn pơlê. Tung mê, ai lối 946 rơpâu klŏng trum má 1 ƀă lối 767 rơpâu 700 klŏng trum má 2, châ pâk lâp vaccine hbrâ mơdât COVID-19 trum má 1 ai 99,03% ƀă pâk trum má 2 ai 80,35% ăm kuăn pơlê cho mâu ngế ki sap 18 hơnăm tơngi klêng.

Nôkố kong pơlê Lâm Đồng dế mơ-eăm mơdêk tơdroăng pâk vaccine, mơ-eăm pâk tâi trum má 1 châ 100% ngế kuăn pơlê ki dế tro hơnăm sap 18 hơnăm tơngi klêng a mơ’nui khế 11 kố. Pakĭng mê, Lâm Đồng xuân hiăng chêh pơkâ pâk vaccine hbrâ mơdât COVID-19 tung măng tĭng kố ăm khu sap 16 troh 18 hơnăm.

Ki hdrối, kô pâk 21 rơpâu 300 klŏng vaccine ăm hok tro a 38 toăng hngêi trung râ má pái phôh thong ƀă hngêi trung hnê cheăng pêi a 5 tơring, pơlê kong kơdrâm tung kong pơlê.

Gương tơplôu ƀă tơbleăng