VOV4.Sêdang -  Hâi lơ 12/8, Vi ƀan hnê ngăn kong pơlê Dak Lak pơkâ tơdroăng ki tê 2 túa plâi kâ xiâm dêi kong pơlê cho sầu riêng ƀă ƀơr ƀă tâi tâng dâng 150 rơpâu tâ̆n. Túa pơkâ kố tiô tối hdrối ăm tơdroăng ki ai pơreăng Covid-19 ôh tá tơniăn tung tơdroăng ki séa ngăn ƀă tơdroăng pơreăng Covid-19 rế ôh tá tơniăn, tê mơdró ngi kong têa ê trâm hên xơpá. Tiô túa pơkâ ki nếo, Vi ƀan hnê ngăn kong pơlê Dak Lak tiô tối hdrối: tâng pơreăng Covid-19 ối tung tơdroăng ki châ hbrâ mơdât môi tiah nôkố, mê kong pơlê pơtối rak vế tê ngi kong têa ê 70% plâi sầu riêng, tơ’mô 72 rơpâu tâ̆n; 30% ki u ối châ tê tung tơnêi têa tiô plâi ki ối drêh ƀă hiăng pâ xo châ tâ pro hngíu.

Tơdế khế 8, drêng hên kơdrum Dona châ krí xo, sầu riêng Dak Lak pơxiâm mot tung rơnó ki xiâm.

Ƀă plâi ƀơr, ƀă tơdroăng ki rơhêng vâ dâng 80%, tơ’mô 32 rơpâu tâ̆n tê tung tơnêi têa, u ối cho tê ngi kong têa ê. Tơdroăng pơkâ ki má péa cho pơreăng Covid-19 tơdjâk ‘mêi, kong pơlê kô tơkŭm mâu kơxô̆ liăn tŏng kum kuăn pơlê tê plâi ƀơr, sầu riêng. Rơhêng vâ tê ngi kong têa ê plâi sầu riêng kơdrph 50% ƀă plâi ƀơr bu 10%. Troh nôkố, sâdu riêng Dona, hdrê ki xiâm châ liăn hên má môi, dế pơxiâm mot tung rơnó krí xiâm, ai yă tê a kơdrum a kơlo pá xôp 45 rơpâu liăn tung 1 kg, kơdroh lối 20% tâng vâ pơchông ƀă khế kố hơnăm nah.

Nga tơplôu ƀă tơbleăng