VOV4.Xơ Đăng - Hâi lơ 14/12, a pơlê kong kơdrâm Ƀuôn Ma Thuột, kong pơlê Dak Lak, Khu xiâm pơkuâ ngăn pơkeăng ƀă khăm pơlât tơrŭm ƀă Viê̆n vê̆ sinh dịch tễ Tây Nguyên tơkŭm po Hneăng hôp tơpui tơno khoa hok ‘na hbrâ mơdât pơreăng xông tâ tú hơnăm 2021. Tiô tơdroăng a Hneăng hôp tơpui tơno, tơdroăng ki hngăm dêi mâu tơdroăng châi ôh tá tâ tú (môi tiah ŭm tung châ, châi plâi nuih, nŭm lo nheăn, châi xôu râ, tơdroăng châi ôh tá kâi hiâm ƀă mâu tơdroăng châi ki ê) dế châ 70% tung tâi tâng tơdroăng hngăm ‘na tơdroăng châi tamo tung lâp tơnêi têa.

Tâi tâng a hneăng hôp

Mâu tơdroăng châi kố pro hlâ mơngế ối má môi. Tiô xêo ngăn, rêm hơnăm hlâ mơngế xua pơreăng ôh tá pro tâ tú châ troh 77% tung tâi tâng kơxô̆ ngế hlâ xua châi tamo. A Tây Nguyên, hơnăm 2020 WHO hiăng tŏng kum 40 cheăm ối tung kong pơlê Kon Tum ƀă Lâm Đồng tung tơdroăng pêi cheăng pơkuâ, pơlât ƀă xêo tơbleăng mâu tơdroăng châi tamo ôh tá pro tâ tú.

Troh hơnăm 2021, troăng pêi kố châ tâk tơ’nôm to 150 cheăm ối tung 5 kong pơlê Tây Nguyên. Mâu rơkong tơpui a hneăng hôp tơpui tơno mơnhên, tơdroăng ki hngăm tung tơdroăng pơkuâ ƀă pêi pro mâu tơdroăng pơlât mơdât pơreăng ki ôh tá pro tâ tú xuân ối trâm hên pá puât, pơloăng mơnúa kal ai troăng pơtâng tối, pơkuâ châ tơƀrê tâ.

A Sa Ly tơplôu ƀă tơbleăng