VOV4.Sêdang - Pêi pro troăng hơlâ tung la ngiâ kế tơmeăm pêi lo ing chiâk deăng hneăng hơnăm 2011 – 2015 ƀă troh hơnăm 2020, kơvâ cheăng ƀă kơmăi kơmok ƀă tê mơdró Dak Lak hiăng tơrŭm ƀă kơvâ pêi chiâk deăng pêi pro séa ngăn xing xoăng ƀă mơnhên tối ivá tơxup tơbriât dêi mâu kế tơmeăm pro ing kơmăi kơmok, tung mê, tơtrŏng troh kế tơmeăm xúa kơmăi kơmok uâ pơliê mơdiê kế tơmeăm pêi lo ing chiâk deăng. Tơdrêng amê hnối tí tăng ‘nâi plĕng ăm Vi ƀan hnê ngăn kong pơlê Dak Lak pơkâ inâi mâu kế tơmeăm pêi lo ing chiâk deăng, kế tơmeăm xúa kơmăi kơmok xiâm, mơjiâng troăng ki kơnía a mâu kế tơmeăm môi tiah: kơphế, ƀơr, mắ ca, tiu.

Troh nôkố, lâp kong pơlê hiăng mơjiâng pro châ 114 tíu tơrŭm cheăng uâ mơdiê, pơliê ƀă tê kế tơmeăm pêt lo ing chiâk deăng ƀă 35 to kế tơmeăm châ mơnhên tối cho mâu kế tơmeăm ki ối tung tơdroăng rêm to cheăm môi kế tơmeăm.

Katarina Nga tơplôu ƀă tơbleăng