VOV4.Xơ Đăng - Rơtế ƀă hên mâu kong pơlê tung lâp tơnêi têa, kong pơlê Dak Lak dế kơdo mơ-eăm thăm mơdêk tơdroăng pâk pơkeăng vaccine COVID-19 tung pơla ai pơreăng pơtối xông tâ tú. Ki rơhêng vâ tối, tơdroăng pâk pơkeăng vaccine dế thăm châ mơdêk ăm mâu pơlê cheăm dêi hdroâng kuăn ngo, tíu ki cheăng ‘na hbrâ, tơplâ, mơdât pơreăng xuân tá hâi teăm pêi kâi plah hnoăng cheăng ƀă hlo xuân u ối hên tíu ki tâ pơreăng.

Nếo klêi pâk trum má 2 vaccine hbrâ mơdât COVID-19, ngoh Y Dhuen Ƀuôn Krông, kuăn ngo Rơđế, ối a ƀuôn Ea Mdhar, cheăm Ea Ñuôl, tơring Ƀuôn Đôn, kong pơlê Dak Lak phiu ro ăm ‘nâi, kố cho rôh pâk vacccine má pŭn  tơkŭm pâk a pơlê. Troh nôkố, tâi tâng mâu ki hiăng kân tung pơlê xuân hiăng châ pâk vaccine, sap nôkố tơdroăng tô tuăn COVID-19 kô kơdroh, rêm ngế kô hmiân tuăn pêi cheăng kâ, pêi chiâk deăng:

‘’Klêi pak vaccine, ing hâi hnah troh hâi kố, á tâ dêi tung châ môi tiah lĕm rơdêi, ôh tá tâ châi, a tâ hmiân tuăn, ôh tá xâu klâi xếo. â xuân mơnê kơ Đảng, Tơnêi têa hiăng tơmâng pro tơ’lêi hlâu ăm tâi tâng kuăn pơlê châ pâk vacccine, á xuân vâ tối pơchân ăm kuăn pơlê thế lăm pâk vaccin, pâk vâ kring vế dêi châ chăn tơná pin, pôi tá tro pơreăng ki klâi ôh’’.

Jâ  H Pôly Êban, Ngế phŏ hnê ngăn ƀuôn Akŏ Đung B, cheăm  Ea Ñuôl, tơring  Ƀuôn Đôn, ăm ‘nâi, klêi 4 rôh mâu kăn ƀă kơvâ cheăng ngăn pơkeăng tơkŭm pâk vaccine mơdât pơreăng COVID-19 a cheăm pơlê hiăng kum vâ chê tâi 700 ngế kơpêng 18 hơnăm tơngi klêng tung pơlê xuân châ pâk vaccine. Tiô jâ H’Pôly, rôh apoăng kuăn pơlê ối xâu ôh tá vâ pâk klêi mê mâu kăn kơvâ cheăng hiăng hnê tối, kum kuăn pơlê hlê plĕng ki pơxúa rơdroăng pâk vacccine. ing mê, mâu roh pâk vaccine kơ’nâi mê kuăn pơlê hiăng troh vâ lăm pâk:

‘’Kuăn pơlê a mâu pơlê hơniâp ro, hâi ki lâi thế lăm pâk vâi prôk lăm pâk tâi, malối kuăn pơlê ki sap 18 hơnăm tơngi klêng. Nôkố tung pơlê kố hiăng châ pâk vâ chê tŭm, mơni ối dâng 15% ngế hâi teăm pâk xua kuăn pơkê dế ôu pơkeăng ƀă mâu ngế ki ‘nâ tung châ ai tơdroăng châi ki ê’’.

Pơkuâ môi pôe hâi pâk vaccine mơdât COVID-19 a pơlê jâ Phùng Thị Tý, Ngế phŏ pơkuâ Hngêi pơkeăng cheăm Ea Ñuôl, tơring Ƀuôn Đôn ăm ‘nâi, hdrối mê cheăm hiăng tơrŭm bbă pơlê chêh inâi mâu ngế thế lăm pâk, klêi  mê tơbleăng lâp lu vâ kuăn pơlê ‘nâi nhên hâi thế lăm pâk. Pơla kố cho rơnó pêi cheăng kal dêi kuăn pơlê mê tơdroăng lăm pâk vaccine xuân thế tơkŭm po pâk rĕng vâ tơniăn tơdroăng cheăng ăm kuăn pơlê lơ tro tơdjâk, hmâ hlo rêm pơlê mơ-eăm bú pâk klêi tung môi hâi:

‘’Malối a rơnó kô, kuăn pơlê púi rĕng châ pâk, vâ rĕng klêi pâk klêi mê rĕng lăm. Tơdroăng pêi cheăng dêi ngin mơ-eăm klâ mơngế pro ti lâi ăm rôh pâk mê  tơ’nôm pâk mê a chôu ki phá tá dế pêi cheăng hên tâ. Pơtih a peăng kơxo ngin kô pâk troh a 12h kơhâi dế. peăng xêi pâk troh 6h’’.

Pôa Trịnh Quang Tấn, Kăn hnê ngăn cheăm Ea Ñuôl, tơring Ƀuôn Đôn ăm ‘nâi, cheăm ai lối 13 rơpâu pơ’leăng mâ mơngế, ƀă dâng 3 rơpâu 900 ngế kơpêng 18 hơnăm, kơxô̆ kuăn pơlê rêh ối amê châ dâng 50%. Mâu kăn cheăm sôk phiu ro tung pơla achê kố kơxô̆ vaccine mơdât COVID-19 châ xing xoăng hên kum ăm kơxô̆ mơngế pâk vaccine rĕng châ pâk lâp lu. Nôkố dế cho rôh pâk má 4 klêi rôh pâk drêng kố, vâ chê 100% ngế kơpêng 18 hơnăm a cheăm hiăng châ pâk vaccine.

Tiô pôa Tấn, vâ chê môi poê hâi pâk a môi pơlê châ tơniăn, tơ-ƀrê hnối thế tơniăn hbrâ mơdât pơreăng, cheăm mơhnhôk tâi tâng khu cheăng kal kí veăng tơmâng hlối hnê mơhnhôk, hlối hnê tối thế kuăn pơlê lăm pâk troh hâi pơkâ, rak ối kơtăn hơngế dêi rơpó, vâ tơniăn tro tiô 5k:

‘’Khu hnê mơhno cheăm, Khu hnê mơhno dêi tơring tơmâng khât, hnê mơhno nhên, klêi mê tôh ki rĕng ăm ‘nâi tơdroăng dêi pơlê, hlối hnê tối ƀă nâl Xuăn, hlối hnê ƀă nâl Rơđế, hnê ăm tơrêm rơpŏng kuăn pơlê mê ngin xuân xoăng ăm kơtâ hlá mơ-éa vâ rêm rơpŏng tơniăn pêi pro tơniăn tơdroăng hbrâ mơdât pơreăng’’.

Công Bắc chêh

Gương tơplôu ƀă tơbleăng