VOV4.Xơ Đăng - Ƀă hnoăng cheăng ki ai hlâu ‘na mâu tơmeăm khoăng ki pêi lo ing chiâk deăng, rơtế ƀă mâu túa cheăng, troăng hơlâ tŏng kum dêi kong pơlê, klêi kơ’nâi 3 hơnăm pơkâ pêi pro, tơdroăng rêm cheăm môi tơmeăm, dó cho OCOP a kong pơlê Dak Lak hiăng châ chiâng pêi pro hên mâu tơdroăng ki ai pơxúa kân khât, ing mê, mơhno tối mâu tơdroăng ki tơƀrê khât vâ mơnhên inâi kế tơmeăm pêi lo ing chiâk deăng.

Tơdrêng ƀă kơphế, ca cao cho môi tung mâu tơmeăm pêi lo châ ngăn cho ki xiâm, ki pêt hên dêi  kong pơlê Dak Lak. Mơhé mâu hơnăm hdrối nah, loăng ca cao Dak Lak iâ châ ‘nâi ƀă ki hên cho tê pŭm. Kơxô̆ liăn châ xo ing pêi lo kế tơmeăm iâ, hâi pêi tâi ki rơdêi a kơpong thôn. Ăm hlo ki kơdroh mê, pôa Trương Ngọc Quang, Ngế pơkuâ kŏng ti pêi cheăng tiô rơnó Ca Cao Nam Trường Sơn a cheăm Ea Na, tơring Krông Ana hiăng tối hlê tơdroăng tê mơdró, ‘no liăn rôe kơmăi kơmok, tơmeăm xúa ki nếo tung uâ pơliê mâu tơmeăm pêi lo  ki dâi lĕm ing tơpoăng ca cao ki hâi teăm hơ’lâk, ƀơr ca cao, kĕo socola... vâ mơhno ki tơ-ƀrê, kŏng ti hiăng tối tơmeăm pêi lo OCOP râ kong pơlê.

Troh nôkố, 3 tơmeăm mê cho: Tơpoăng ca cao hâi teăm hơ’lâk, kĕo socola prăng, kĕo socola ai têa tôu ro dêi kŏng ti châ 4 hơlŏng tung tâi tâng 8 tơmeăm ki pêi lo pơxá 4 hơlŏng râ kong pơlê. Pôa Trương Ngọc Quang, Ngế pơkuâKŏng ti ăm ‘nâi:

“Klêi tơmeăm pêi lo dêi kŏng ti châ mơnhên OCOP 4 hơlŏng râ kong pơlê, mê xuân cho tíu tơdjêp vâ kŏng ti veăng tung mâu tíu tê tơmeăm OCOP. Ing mâu tíu tê tơmeăm OCOP môi pâ mơhno ivá pêi cheăng xuân môi tiah ki tơ-ƀrê dêi tơmeăm pêi lo, ing mê mơngế ki rôe kô loi vâ rôe ƀă khĕn kơdeăn tơmeăm ki mê. Ing mâu tíu tê tơmeăm châ mơnhên OCOP mê tơmeăm pêi lo troh nôkố hiăng châ troh a kŏng mơngế ki rôe xúa troh tung lâp lu ƀă rĕng tâ”.

Kŏng ti pêi cheăng tiô rơnó Ca Cao Nam Trường Sơn a Hneăng hôp tối, klâ xoăng ối má to lâi dêi tơmeăm pêi lo OCOP râ kong pơlê

Tiô pôa Võ Văn Sơn, Ngế pơkuâ Khu pêi cheăng tơrŭm pêi chiâk deăng Thăng Bình, cheăm Čư Kty, tơring Krông Bông, kong pơlê Dak Lak mơnhên OCOP ăm tơmeăm pêi lo mê rế châ tơmâng khât, chiâng tơdroăng ki ai pơxúa ăm mâu ngế pêi chiâk, pêi pro tơmeăm, tê mơdró. Mâu tơmeăm châ mơnhên OCOP cho môi tơdroăng châ tối kal khât tung tơdroăng, kum tơmeăm pêi lo châ tơniăn ki lĕm, túa pro mơnâ mâ, tơdrong tâ, xiâm tíu mơjiâng pro ƀă mơdêk ivá tơbriât tê tơmeăm. ăm hlo nhên má môi cho tơmeăm pêi lo phái krúa HTB dêi khu pêi cheăng tơrŭm drêng châ Vi ƀan kong pơlê Dak Lak mơnhên cho tơmeăm OCOP 3 hơlŏng têtâk luâ tâ 2 hdroh tâng vâ pơchông ƀă hdrối nah, tơmeăm tê xuân tâk sap 200 tâ̆n troh 400 tâ̆n/hơnăm, propơxúa hên tơdroăng ăm Khu pêi cheăng tơrŭm xuân môi tiah mâu ngế ki veăng.

Pôa Võ Văn Sơn tối:

“Hdrối nah, tơmeăm tiah hmâ tê oh tá ai vâi ‘nâi, tơdroăng tê mơdró xuân xơpá, la drêng tơmeăm pêi lo châ mơnhên OCOP mơdêk tơmeăm pêi lo tâk troh 1 hvêa ki tơ-ƀrê, túa pêi lo tơmeăm drêng mê mơngế ki rôe kô tơ’lêi vâ tối, kô ‘nâi, kô tơbleăng ămmơngế ki ê rôe tơmeăm dêi tơná. Kố cho tơdroăng ki tơ-ƀrê ing tơmeăm pêi lo ki hmâ dêi kuăn pơlê pêi chiâk deăng chiâng tơmeăm pêi lo châ mơnhên OCOP mâu hơlŏng ƀă xuân cho rôh vâ tơmeăm pêi lo dêi kuăn pơlê ki pêi chiâk ing ‘’Long kŭn dêi pơlê’’ châ tơbleăng tê troh mâu kong têa ki kân”.

Tơmeăm pêi lo OCOP châ tơbleăng a Tíu tơbleăng mâu tơmeăm pêi lo OCOP kong pơlê Dak Lak

Pôa Nguyễn Hoài Dương, Ngế pơkuâ ngăn pêi chiâk ƀă mơnhông mơdêk thôn pơlê kong pơlê Dak Lak ăm ‘nâi: Dak Lak nôkố ai 46 tơmeăm pơlê OCOP, tung mê ai 8 tơmeăm châ mơnhên tối 4 hơlŏng,  ƀă 38 tơmeăm châ mơnhên tối 3 hơlŏng. Tơdroăng klâ pơxá, ối má to lâi hơlŏng dêi mâu tơmeăm OCOP cho vâ mơnhên ăm hlo ki lĕm tơ-ƀrê, túa pro mơnâ mâ mâu tơmeăm mê.

Tơdroăng kố veăng mơdêk hlê plĕng, ai hnoăng pêi dêi kuăn pơlê, khu mơdró tung pêi pro, rak tơniăn inâi dêi tơmeăm pêi lo OCOP xuân môi tiah hnoăng ki pơxúa dêi mơngế rôe xúa. Tung la ngiâ, kơvâ ngăn pêi chiâk kô tơrŭm ƀă khu ngăn tê mơdró pơtối tơbleăng mâu tơmeăm OCOP hiăng ai a kong pơlê troh mơngế rôe xúa tung tơnêi têa ƀă kong têa ê.

“Tơdroăng tơdjêp tăng tíu tê tơmeăm pêi lo chokal khât tung mơjiâng ki pơxúa tơmeăm pê lo OCOP. ‘Nâi nhên tơdroăng mê Khu xiâm ngăn tê mơdró dế pơtroh ăm Vi ƀan kong pơlê kĭ tơdroăng tơkêa bro tê tơmeăm pê lo OCOP. Tơdroăng tơkêa mê châ kĭ kum hên tíu ki tê tơmeăm pêi lo OCOP kô châ chiâng. Ing mê, tơdjêp ƀă mâu kong pơlê,  mâu kơpong tung lâp tơnêi têa vâ tê tơmeăm pêi lo mơdêk pêi lo tơmeăm pơxá OCOP mơnhông rơdêi tung la ngiâ”.

Mơ-eăm pêi lo tơmeăm dêi kong pơlê châ mơnhên tơmeăm OCOP dế chiâng tơdroăng mơhnhôk mơnhông cheăng kâ thôn pơlê a Dak Lak. Tơdroăng kố xuâ dế pro ivá kân ăm ‘na mơjiâng thôn pơlê nếo tiô troăng rơhlâ krá tơniăn pêi lo tơmeăm ing chiâk deăng dêi kong pơlê.

Hương Lý chêh

Gương tơplôu ƀă tơbleăng