VOV4.Xơ Đăng - Kong pơlê Dak Lak a hâi lơ 24/11 hiăng tơdah 64.250 kong kếo vaccine Comirnaty dêi Pfizer – BioNTech xua Khu xiâm pơkuâ ngăn pơkeăng ƀă khăm pơlât xing xoăng ăm vâ po rơdâ pâk ăm vâi hdrêng sap ing 12 troh 17 hơnăm. Kong pơlê kô po rơdâ pâk kơxô̆ vaccine kố tung khế 11 kố. Tiô kơxô̆ vaccine châ xing xoăng ăm, Dak Lak kô pêi pro tơdroăng pâk ăm vâi hdrêng tiô hơnăm ing hên tro iâ.

Dak Lak po rơdâ pâk vaccine ăm vâi hdrêng sap ing 12 – 17 hơnăm

Tiah mê, ƀă lối 64.000 kong kếo vaccine châ xing xoăng ăm roh kố, kong pơlê tơkŭm pâk ăm tâi tâng hok tro râ má pái. Tíu pâk châ pêi pro a mâu hngêi trung hriâm, hok tro dêi hngêi trung ki lâi kô pâk a hngêi trung ki mê, tơdroăng tơkŭm po pâk tơniăn pơkâ 5K ‘na hbrâ mơdât COVID-19. Nôkố kơvâ ngăn pơkeăng ƀă khăm pơlât Dak Lak hiăng hnê mơhno ăm tâi tâng mâu ngế pêi cheăng a mâu hngêi pơkeăng cheăm ‘na troăng ki pâk vaccine ăm vâi hdrêng tiô tro hnê mơhno dêi Khu xiâm ngăn pơkeăng ƀă khăm pơlât.

A Sa Ly tơplôu ƀă tơbleăng