VOV4.Sêdang -  A tơring Čư Mgar, kong pơlê Dak Lak, mơngế păn mơnăn mơnôa trâm hên pá puât xua pơreăng xông tâ tú a kơpôu ro chu râ ó.

Khu ro tro tâ pơreăng êi kéa po pom hlâ vâ chê tâi, jâ Hoàng Thị Chấn ối a tôh kơphô̆ 8, pơlê kân Quảng Phú, tơring Čư Mgar, kong pơlê Dak Lak khéa hơ’nêng drêng tâi tâng kơxô̆ liăn rơpŏng mơ’no cheăng hía tâi tâng. Jâ Chấn tối ăm ‘nâi, khu ro 4 to nôkố hiăng hlâ 3 to, tro lŭp vâ chê 100 rơtuh liăn.

‘’Xuân krếo vâi ttroh a hngêi vâ pâk pơkeăng, klêi mê hbrâ mơdât pơreăng, xôh pơkeăng pêi pro tâi tâng. Laga pơreăng rĕng ‘nâng, hdrối nah ro kăn hlâ, 3 hâi kơ’nâi ro kuăn hlâ há. Nôkố hiăng châ vâ chê 2 khế xuân ối tro tâ pơreăng xua mê gá xuân hlâ’’.

Rơtế ƀă pơreăng êi kéa lo po pom a khu kơpôu ro, nôkố a tơring Čư Mgar pơreăng châu klêa chu châu Phi xuân dế xông tâ tú rĕng. Pôa Nguyễn Ngọc Đương, ối a thôn Hiệp Hòa, cheăm Quảng Hiệp, tơring Čư Mgar tối ăm ‘nâi, 3 to chu kăn ƀă chu hơ’nêh dêi rơpŏng hbrâ vâ tê hiăng hlâ xua tro tâ pơreăng, prâu tah tôi.

‘’Á xuân pâk tŭm vacccine 3 tung 1, pơreăng châi klêa chu, tuăn ngiât, hbáu mông tơlŏng kơchuôp chêng. Ngin păn klâ kơtăn cho tơniăn laga ôh tá ‘nâi xiâm kối pơreăng tâ tú, ôh tá ‘nâi ing lâi. Hâi apoăng châ hlo 1 to kéa khêi khêi, troh hâi má péa tâi tâng khu chu chôm tâi tâng môi chât to lâi to, tá chu kăn ƀă chu krếo. Á ai tơbleăng ăm kơ koan pơlât mơnăn cheăm, khu râ kăn pơkuâ cheăm vâi chu xo mơheăm khăm ngăn mê hlo yương tĭnh ƀă pơreăng châi klêa chu Châu Phi’’.

Kăn ƀô̆ pơlât mơnăn pâk pơkeăng ăm ro

Tiô mơnhên dêi Ƀơrô ngăn ‘na chiâk deăng ƀă mơnhông thôn pơlê tơring Čư Mgar, troh nôkố pơreăng êi kéa lo po pom a khu kơpôu ro chu xông tâ tú a 42 thôn, pơlê, tôh kơphô̆ ối tung 14 cheăm, pơlê kân. Khu cheăng hiăng tơkŭm tâp 88 to kơpôu ro ƀă tâi tâng vâ chê 8.500 kilô. Ƀă pơreăng châi klêa chu châu Phi hiăng tâ tú tung 9 cheăm, pơlê kân, ƀă tâi tâng ki hngăm prâu tâp kơđu vâ chê 26.000 kilô.

Prâu tâp kơđu kơpôu ro tro tâ pơreăng

Pôa Nguyễn Quang Đức, Kăn pơkuâ ‘na păn mơnăn mơnôa tơring Čư Mgar, tối ăm ‘nâi, nốkố kơvâ khăm pơlât mơnăn hiăng tơkŭm po vaccine ăm khu mơnăn păn, tơdrêng amê tơrŭm ƀă khu râ kăn pơkuâ cheăm thăm gâk mơdât, thăm mơnhông tơdroăng pơkuâ, mơdât tơdroăng kơdê siê chêh, pơto, tê kuăn kiâ kong tung tơring.

‘’Drêng pơreăng xông tâ tú, Tíu xiâm pơlât mơnăn ƀă Ƀơrô pêi chiâk deăng ƀă mơnhông mơdêk thôn pơlê tơring hiăng xúa mâu troăng ki thâ xôh pơkeăng kơdê pơreăng, pâk vaccine ƀă pơreăng êi kéa lo po pom. Troh nôkố pơreăng hiăng châ mơdât. Drêng tâ tối tơdroăng ai pơreăng mê tíu xiâm pơlât mơnăn păn kô chu séa ngăn, xôh pơkeăng kơdê pơreăng, xo mâu mơheăm pơtroh kơ koan râ kơpêng khăm ngăn. Drêng tơkôm tâng hlo mơnăn păn hlâ mê kô tơkŭm tâp kơđu. Tâng yương tĭnh mê tơkŭm po tơdrêng troăng hbrâ mơdât pơreăng tơdrêng amê ƀă tơbleăng tơdrêng ăm kong tơring’’.

Tuấn Anh chêh

A Sa Ly tơplôu ƀă tơbleăng