VOV4.Xơ Đăng - Khu pơkuâ ‘na Mơhno túa lĕm tro – Tơ’noăng ivá ƀă ôm hyô kong pơlê Dak Lak tơkŭm po mơđah tơbleăng ƀă mơnhên tơdah xúa hơdruê pro pơro Pói tơngah Dam Săn – tơdroăng chêh châ mơjiâng tiô xiâm kối rơngê rơngối Dam Săn dêi hdroâng kuăn ngo Rơđế, ƀă pói tơngah mơjiâng môi tơdroăng chêh kân tung tơdroăng hơdruê Việt Nam.

Hơdruê pro pơro Pói tơngah Dam Săn cho tơdroăng tơkêa bro châ kong pơlê Dak Lak kĭ ing pơkâ dêi Kŏng ti pêi cheăng tiô rơnó Sông Thương Garden, pơcháu ăm Khu pơkuâ Mơhno túa lĕm tro – Tơ’noăng ivá ƀă Ôm hyô pơkuâ, nhak sih Nguyễn Cường pro ngế chêh pro ƀă cho ngế hnê mơhno, khu hơdruê xoâng hdroâng mơngế kong pơlê Dak Lak mơđah tơbleăng.

Nhạc sih Nguyễn Cường

Jâ H Yim Kđoh, Kăn phŏ hnê ngăn Vi ƀan kong pơlê Dak Lak tối ăm ‘nâi, Tơdroăng tơkêa bro Hơdruê pro pơro Pói tơngah Dam Săn châ kong pơlê kĭ vâ mơjiâng môi tơdroăng mơđah tơbleăng ki kân tung tơdroăng hơdruê xuâng Việt Nam. Vêh pro, rak vế ƀă mơđah tơbleăng tơdroăng mơnhông mơdêk khôi túa lĕm troh hdroâng mơngế Rơđế ing mâu tơdrá, tơdroăng hơdruê xuâng châ xúa tung tơdroăng chêh; mơjiâng tíu mơđah tơbleăng lĕm phá tơ-ê ƀă pói tơngah kô chiâng môi tơmeăm mơhno túa lĕm tro ôm hyô ki má môi Dak Lak, châ mơđah tơbleăng tiah hmâ rêm hơnăm.

A Sa Ly tơplôu ƀă tơbleăng