VOV4.Sêdang - Kong pơlê Dak Lak nôkố ai 208 rơpâu ha loăng kơphế dế tung pơla vâ tôh. Tơdroăng ki vâ têa gá kal khât, vâ kơdroh ki tro khăng răng, la tơdroăng tăng têa tôh đi đo cho tơdroăng ki xơpá ăm mâu ngế ki pêt kơphế tung hên hơnăm hdrối. Laga, tung rơnó tô kố, mâu troăng ki tôh kơdĭng châ xúa tung lâp lu hiăng pro hơ’leh tơdroăng mê, kơphế hiăng xông lĕm tơniăn tá tung pơla kong tô mơdrăng ó môi tiah kố.

Pôa Triệu Văn Khang a cheăm Ea M’Droh, tơring Čư̆ Mgar ai 2 ha kơphế dế tung pơla ai plâi ăm ‘nâi, troh nôkố, mâu têa plông, mâu long, rơchoâ pơrá hiăng xiâ. La kơnôm ing pêi pro kơtăng túa pơkâ tôh têa kơdĭng. Ƀă têa ki iâ sap ing têa klôh ki pong, rơpŏng xuân dế rak tơniăn tŭm tôh ăm kơdrum loăng xông lĕm tiah hmâ.

“Toh têa drêng kố mê rơpŏng á athế xúa têa sap ing têa klôh ki pong. Tung pơla tôh mê á xúa têa kơdĭng ƀă tuá ki gak ngăn a kơdrum. Rêm rôh tôh mê á hơ’leh klŏng troh a tíu ê pôi tá ăm tơdroăng ki têa hên luâ râ pro mơhrê’’.

Tôh têa ki môi tiah kong mê lơ ối khĕn cho tôh têa lo i iâ, cho troăng ki tơ-brê vâ tung pơla tôh têa a rơnó tô ăm kơdrum kơphế a Dak Lak

Xuân séa ngăn kơtăng tơdroăng ki tôh têa kơdĭng, pôa Phùng Văn Nhiên a cheăm Quảng Hiệp, tơring Čư̆ Mgar hiăng hơ’leh tâi tâng sap ing tơdroăng ki tôh hên hĭn chiâng tôh lo i iâ ăm 3 ha kơphế. Pôa Nhiên ăm ‘nâi, ‘no liăn pro tơdroăng ki tôh têa kơdĭng lo i iâ gá ‘no hên liăn, la châ tơnêi têa mơhnhôk, tŏng kum, mê rak tơniăn châ tôh ăm kơphế xông kân lĕm tơniăn tá pơla rơnó tô ó môi tiah kố.

‘’Kơpong hngêi á hmâ mot a rơnó tô mâu long, rơchoâ, têa plông, têa kroăng gá xiâ tâi. Xua mê hngêi á xúa têa klôh vâ tôh. Tâi tâng kơdrum loăng xuân hiăng hơ’leh tôh lo têa i iâ, tơdroăng kố châ tơnêi têa tŏng kum tơdế kơxô̆ liăn tơdế. Drêng tôh mê xuân athế séa ngăn nhên tơrêm chôu vâ pôi tá tôh hên luâ râ mơhrê têa, tiah mê nếo kâi vâ rak vế troh mơ’nui rơnó tô kố’’.

Vi ƀan hnê ngăn kong pơlê Dak Lak kum kuăn pơlê tơdế kơxô̆ liăn drêng krâ ‘măn klŏng ki tôh têa lo i iâ ăm kơdrum kơphế.

Xuân tiô pôa Nguyễn Thanh Long, kăn ngăn rơchoâ long têa kong pơlê Dak Lak, kong tôu ton tung rơnó mơdrăng kố hnối tơdjâk troh tơdroăng ki ôh tá bê têa vâ tôh ăm kơphế, mê cho tơdroăng hiăng hmâ trâm đi đo tung hên hơnăm hdrối a kong pơlê. Laga, tơdroăng kố dế rế hía rế châ hơ’lêh ing tơdroăng ki po rơdâ lâp lu mâu túa pơkâ tôh têa kơdĭng.

Vi ƀan hnê ngăn kong pơlê Dak Lak xuân hiăng ai tŏng kum vâ kuăn pơlê tơ’lêi hlâu tơbleăng kih thuâ̆t ki tôh têa nếo kố.

“Sap ing apoăng rơnó tô ngin hiăng mơhnhôk kuăn pơlê kal xúa têa kơdĭng, kơdĭng têa a mâu rơchoâ ki kŭn vâ kum ăm tơdroăng ki tôh têa ăm mâu hdrê loăng pêt. Tơdroăng ki tôh mê hnê ăm vâi krâ nhŏng o tôh kơdĭng, pôi tá mơhrê têa. Tơbleăng xúa hơ’lêh kơmăi kơmok túa tôh têa kơdĭng. Tơdroăng kố mê Vi ƀan hnê ngăn kong pơlê kum tơdế ăm vâi krâ nhŏng o tâng rơpŏng ki lâi hơ’leh xúa tôh têa kơdĭng tiô túa kơmăi ki lo iâ kố’’.

            Tuấn Long chêh

Katarina Nga tơplôu ƀă tơbleăng