VOV4.Sêdang - Hâi lơ 25/5, kăn pơkuâ Khu ngăn chiâk deăng ƀă mơnhông thôn pơlê kong pơlê Dak Nông ăm ‘nâi, tíu pêi cheăng kố dế tơbleăng mâu troăng hơlâ mơdêk rak ngăn ki dâi lĕm hdrê loăng mắc ca a kong pơlê. Tiah mê, Khu ngăn chiâk deăng ƀă mơnhông thôn pơlê pơkâ, mâu tíu ki mơdâ ƀă tê hdrê loăng mắc-ca athế tơbleăng tơdrăng ki dâi lĕm tro tiô pơkâ. Ki dâi lĕm xúa hdrê loăng mắc ca a kong pơlê ôh tá iâ tâ ki dâi lĕm tơnêi têa.

Mâu ngế krê, tíu pêi cheăng athế pêi pro kơtăng mâu tơdroăng pơkâ luât ‘na mơdâ, tê hdrê loăng mắc ca. Hlo tơdroăng ki tê hdrê loăng mắc ca, mâu ngế krê, mâu tíu pêi cheăng, tơkŭm po athế tơbleăng troh Khu ngăn chiâk deăng ƀăng mơnhông thôn pơlê kong pơlê DakNông mâu tơdroăng, môi tiah: Tíu ki tê, inâi ngế ki pơkuâ lơ ngế ki teăng mâ tơtro luât, kơxô̆ phôn vâ krếo.

Katarina Nga tơplôu ƀă tơbleăng