VOV4.Sêdang - Môi tíu êi kéa lo po pom a kơpôu, ro hiăng hlo a cheăm Đăk Djăng, tơring ‘Mang Yang, kong pơlê Gia Lai. Mê cho hâi lơ 28/5, ai 19 to ro dêi 12 rơpŏng kuăn pơlê a pơlê Brếp ƀă Đê Rơn (cheăm Đăk Djăng, tơring ‘Mang Yang hlo êi môh ai têa kơƀêl, mâ ai ‘nhêa, ai mâu tíu lo êi tơrân tân a ko,  klêa, chêng, a tíu nŭm, tơngê tô 40độ C, rêi nhâ la rêi iâ tê ôh tá vâ rêi hên. Khu ngăn ‘na păn mơnăn ƀă pơlât mơnăn kong pơlê Gia Lai hiăng xo ngăn mơheăm, têa ki kơƀêl ăm hlo, ai 2 túa ăm ‘nâi dương tính ƀă pơreăng êi kéa ki lo po pom.

Troh kơxê lơ 1/6, tâi tâng ro ki tiô tối môi tiah kơpêng mê hiăng tâk troh 27 to, a 20 rơpŏng hngêi. Mâu kăn dêi cheăm tơring hiăng tơbleăng kơpong ki tro pơreăng êi kéa lo po pom a kơpôu ro cho cheăm Đăk Djrăng; cheăm hiăng tơbleăng tơdrêng mâu troăng hơlâ pêi pro vâ kơdroh pơreăng tâ tú, ah lơ tơdjâk tâi tâng mâu kơpôu ro chu.

Pơreăng xông tâ tú a kơpôu ro chu a kong pơlê Kon Tum dế pơtối pro tro lŭp ăm mơngế păn mơnăn mơnôa. A péa cheăm tíu tơkăng kong Đăk Nhoong ƀă Đăk Blô dêi tơring Đăk Glei dêi kong pơlê kố nôkố hiăng ai vâ chê 200 to kơpôu, ro tro hlâ nhôm xua pơreăng pro mơheăm tơkâ.

Pôa A Mon, Kăn phŏ hnê ngăn Vi ƀan cheăm Đăk Blô, tơring Đăk Glei, kong pơlê Kon Tum tối ăm ‘nâi, xêo sap ing hâi lơ 11 troh tâi hâi lơ 31/5 a 3 thôn dêi cheăm, ai: Đăk Book, Pêng Lang ƀă Bung Tôn ai 69 to kơpôu, ro tro hlâ hiăng châ khu râ kăn pơkuâ mơhnhôk kuăn pơlê tơkŭm tâp kơđu.

Kuăn pơlê cheăm Đăk Blô djâ kơpôu, ro hlâ lăm tâp kơđu

Xiâm kối kơpôu, ro chu tro hlâ châ kơvâ pêi chiâk deăng tơring mơnhên xua pơreăng mơheăm tơkâ. Drêng ai tơdroăng kơpôu, ro tro klâ hên, khu râ kăn pơkuâ cheăm hiăng mơhnhôk kuăn pơlê djâ kơpôu, ro ki kơ’nêi hmâng vâ mê kroăng tung kơdroăng, pâk pơkeăng hbrâ mơdât pơreăng ăm kơpôu, ro laga tơdroăng ki kơpôu, ro tro hlâ xuân pơtối ai.

A kong pơlê Kon Tum pơreăng tung a kơpôu ro chu dế xông tâ tú ó ƀă pro tro lŭp ăm mơngế ki păn. Nôkố, rơtế ƀă pơreăng xông tâ tú hiăng pro vâ chê 200 kơpôu, ro hlâ a 2 cheăm tíu tơkăng kong Đăk Nhoong ƀă Đăk Blô dêi tơring Đăk Glei, Kơ koan xiâm pơkuâ mơnăn ƀă pơlât mơnăn kong pơlê xuân hiăng châ hlo pơreăng êi kéa lo po pom a khu ro xông tâ tú a 3 tơring: Kon Plông, Sa Thầy ƀă Ia H’Drai. Pakĭng mê pơreăng châi klêa chu châu Phi xuân tơ’lêi xông tâ tú drêng lâi ôh tá ‘nâi.

Gương - A Sa Ly tơplôu ƀă tơbleăng