VOV4.Sêdang - Tiô mơnhên dêi kơ koan ngăn tơdroăng cheăng, tung tung la ngiâ, mơni tơdroăng ki êi kéa po pom a kơpôu, ro a Gia Lai kô pơtối tâ tú xua tá hâi hbrâ mơdât châ mâu véc-tơ ki pro pơreăng tâ tú. Pơreăng êi kéa po pom a kơpôu, ro châ mơnhên tâ tú ing mâu kế ki pâk, chik, hrik xo mơheăm mê tơdroăng ki séa ngăn hbrâ mơdât xơpá. Gia Lai cho kong pơlê ki ai tâi tâng kơxô̆ kơpôu, ro hên má môi kơpong Tây Nguyên ƀă ối má 2 tung lâp tơnêi têa ƀă tâi tâng lối 431 rơpâu to.

Maluâ cho kong pơlê ki ai tâi tâng kơpôu, ro hên la ki hên vâi păn tiô túa ki păn iâ, păn kơ’nêi hmâng vâ ƀă kơpong păn ôh tá rak tơniăn tơdroăng ki krúa lĕm, tung mê ai pơreăng êi kéa po pom tâ tú ing mâu kuăn ki pâk, chik, hrik xo mơheăm. Kố cho môi tung mâu tơdroăng ki xơpá, ăm hnoăng cheăng hbrâ mơdât pơreăng a kong pơlê. Xua mê, hnoăng cheăng tối tơbleăng vâ kuăn pơlê ‘nâi nhên ‘na pơreăng êi kéa po pom vâ hbrâ pêi pro mâu tơdroăng hơlâ hbrâ mơdât cho kal khât ƀă kal châ mơdêk tối tơbleăng.

Katarina Nga tơplôu ƀă tơbleăng