VOV4.Sêdang - Tiô Khu păn roăng ƀă pơlât mơnăn kong pơlê Gia Lai, riân troh 15 chôu kơxê lơ 7/9, lâp kong pơlê ai vâ chê 15 rơpâu to ro hiăng châ pơlât prêi ‘na pơreăng êi kéa lo po pom. Sap ing rôh ki pơreăng tâ tú, troh nôkố lâp kong pơlê Gia Lai ai lối 20 rơpâu to ro dêi lối 12 rơpâu rơpŏng tâ pơreăng êi kéa lo po pom. Tung mê, ai vâ chê 2 rơpâu to ro hiăng hlâ ƀă hiăng prâu tah tâp kơđu xua ôh tá ai ivá, lơ hiăng tro mâu pơreăng ki ê: êi xôu, kơtóu mơheăm.

 Xôh pơkeăng kơdê pơreăng ăm kơdroăng ro a Gia Lai

Khu ki ai tơdjâk rơtế ƀă kuăn pơlê mâu tơring, cheăm hiăng pơlât prêi ăm vâ chê 15 rơpâu to ro. Hiăng ai 34 to cheăm dêi 9 tơring, pơlê krâm, pơlê kong kơdrâm ôh tá ai kơpôu, ro tro pơreăng, tung ai 3 to cheăm A Dơk, Trang, Ia Băng, tơring Đăk Đoa hiăng séa ngăn tŭm tơbleăng hiăng tâi pơreăng.

Tiô khu ngăn păn roăng ƀă pơlât mơnăn kong pơlê Gia Lai, châ tơdroăng ki tơƀrê kố, kơvâ ngăn pêi chiâk deăng kong pơlê Gia Lai hiăng pêi pro tơdâng tơ’mô hên troăng hơlâ hbrâ mơdât pơreăng êi kéa lo po pom tung pơla hdrối kố nah.

Katarina Nga tơplôu ƀă tơbleăng