VOV4.XƠ Đăng - Nôkố, mâu kong pơlê tung lâp tơnêi têa hiăng ăm hok tro troh hriâm a hngêi trung, tá hok tro a hơnăm hiăng châ pâk vaccine hbrâ mơdât COVID-19 ƀă hok tro tá hâi châ pâk. Tung pơla pơreăng COVID-19 pơtối xông tâ tú ó, kơ koan cheăng hiăng pơkâ mâu troăng hbrâ mơdât tâng châ hlo ngế F0 tung hngêi trung ƀă kal hbrâ troăng pơlât ăm hok tro tâ COVID-19.

Mơhé hên kơxô̆ vâi’nĕng tâ COVID-19, kơxô̆ mơngế tâ tú ó iâ la xuân ối ai ngế hlâ drêng ai hên ngế tâ tú luâ râ.  Drêng hok tro lăm hriâm nếo, tối tơbleăng hdrối kơxô̆ mơngế tâ COVID-19 a vâi’nĕng kô tâk. Xua mê, mâu ki rơkê tối nhên ki xiâm thế ‘nâi hbrâ mơdât pơreăng ƀă ôh tá ăm ai hên vâi ‘nĕng tâ tú tơdrêng môi hdrôh, xua mâu túa pơkeăng pơlât COVID - 19 ôh tá mơhnhôk thế pơlât tŭm ăm vâi ‘nĕng.

Pôa Trần Minh Điển, Ngế xiâm ngăn pơkeăng pơlât dêi Hngêi pơkeăng Nhi Trung ương tối tiah kố, tơdroăng pêi pro thế pro ti lâi vâ tơniăn ăm mâu hok tro troh a hngêi trung ai hên tơdroăng ki troh, tung mê mâu hngêi trung hnê hriâm, mâu kăn ƀă mâu khu ngăn pơkeăng pơlât chêh pro hdrối tơdroăng vâ hbrâ ví ăm tơniăn tâi tâng mâu hngêi trung hriâm.

Pakĭng mê, mâu nôu pâ thế hbrâ rơnáu đi đo hnê kuăn ‘nĕng ƀă hlối rơtế ƀă hngêi trung hnê tối ăm kuăn ‘nĕng rak vế pêi pro tro tơdroăng hbrâ mơdât pơreăng, malối thế rak vế tro  tơdroăng pơkâ ‘’5k’’. Drêng nhôm ai ngế tâ tú virus SARS-CoV-2  tung lâm hriâm, hngêi trung thế pôi tá préa, tơrŭm ƀă mâu khu ngăn pơkeăng cheăm tơring, kong pơlê vâ tối tơdroăng mê ăm nôu pâ hok tro vâ tăng ‘nâi xiâm dêi pơreăng dêi hok tro ki mê:

‘’Pin thế tăng xiâm ngế ki tâ tú choâ tăng ngăn a lâ, hriâm ki mê ‘nôi ƀă xuân xuân chiâng bú kơ-êng ngăn môi péa kơ-ƀăng dêi o ki mê ối, tí tăng ‘nâi môi péa tíu o ki mê xah ối hên tê, mê tâng pin ôh tá vâ kơ êng tí tăng ngăn thế klĭng péa hlối môi hngêi trung hriâm lơ klĭng péa pơtê dêi môi lâm ki mê. Tơdroăng ‘na hngêi trung hriâm tơniăn drêng ai ‘nâ ôh tá xê ‘’Ôh tá ai COVID’’ mê tơdroăng dêi hngêi trung hriâm tơniăn cho pin thế mơjiâng tơdroăng chêh hbrâ rơnáu hdrối, pin thế rĕng tăng xiâm ki tâ tú, pin thế hdró kơpong a mâu kơpong ki mê vâ tơniăm ăm hngêi trung hriâm ‘’.

Tâng ngế hok tro ôh tá mơhúa tro tâ COVID-19, mê nôu pâ hok tro thế pôi tá prế, pôi tá tô tuăn luâ râ ƀă pôi tá xâu rơ iô. Drêng kuăn ‘nĕng ối a hngêi, nôu pâ thế đi đo ngăn kuăn ‘nĕng gá ti lâi, hôm ai tơngê, kơ-o klâi há vâ veăng kum ăm ‘nâi ƀă tối tơbleăng ăm khu ngăn pơlê vâ ai xiâm ki pơlât tơtro ăm ngế ki tâ tú.

Pôa Trần Minh Điển, Ngế pơkuâ Hngêi pơkeăng Nhi Trung ương hnê tối tối:   ‘’Kố cho môi túa pơreăng tâ tú, xua mê klâ ối kơtăn xuân kal. Tâng pin ôh tá klâ ăm muăn ối kơtăn mê kô tơ’lêi tâ tú troh mâu vâi o ku kun tâ, klêi mê nôu pâ, jâ pôa, malối cho mâu vâi nôu, vâi nâ ki dế mơ-éa ‘lo. Xua mê, tung rêm tơdroăng, rêm rơpŏng hngêi thế pôi tá préa thế séa ngăn tiô hnê mơhno dêi kơvâ ngăn pơkeăng tơdroăng polât a hngêi môi tiah lâi ƀă tơdroăng ăm hlo ki lâi ki rế ó tâ, tơkéa vâ tối ki rế râ ƀă kal thế lăm khăm a mâu hngêi pơkeăng lơ kal thế djâ mot pơlât a hngêi pơkeăng, vâ tơniăn má môi ăm mâu vâi o’’.

A hneăng hôp nếo achê kố ‘na tơdroăng pơlât ăm mâu vâi o ki tâ COVID-19, pôa Vũ Đức Đam Ngế pro xiâm phŏ hnê ngăn Chin phuh hiăng pơcháu ăm Khu xiâm ngăn hnê hriâm ƀă hnê mơjiâng tuăn ngôa rơkê ƀă mâu kơ koan tơdjâk troh chêh tơdroăng ki nếo tâng lơ trâm drêng hoktro vêh lăm hriâm a hngêi trung, ai vâi ‘nĕng tâ COVID-19. Hlối tối, thâ pê klêi, pơkâ hlá mơ-éa hnê mơhno ‘na tơdroăng cheăngƀă tơdroăng hdró pơlât COVID-19 ƀă mâu ngế pá xôp 18 hơnăm, malối cho mâu vâi o pá xôp 12 hơnăm.

VOV1 chêh

Gương tơplôu ƀă tơbleăng