VOV4.Xơ Đăng - Pin dế ối a hâi má mơ’nui dêi hơnăm Tân Sửu, tiô khôi túa lĕm tro ton nah dêi hdroâng mơngế Việt Nam, tối cho “hâi má 30 Têt”. Hâi kố, maluâ ai kơbố lăm a tíu hơngế la xuân rơhêng vâ vêh tơkŭm dêi ƀă rơpŏng hngêi, pơlê cheăm tung mâu hâi Têt: vâi rơtế tơpui tơno mâu tơdroăng ki hơniâp ro tung rêh ối, vâ rơtế tơdroăng ki rơhêng mơ-eăm tơƀrê tâ nếo tung hơnăm la ngiâ. A kong pơlê Kon Tum, tung pơla hdrối kố nah, mâu ngế pêi cheăng xuân hiăng vêh ing kơpong ki ai pơreăng COVID-19 peăng Hdroh. Vâ ai môi rôh Têt hơniâp ro, tơniăn tung tơdroăng ki tiah hmâ nếo, khu kăn pơkuâ, kơvâ cheăng ki ai tơdjâk ƀă kuăn pơlê kong pơlê Kon Tum dế mơdêk hiâm mơno hbrâ kơchăng tung mơdât pơreăng ƀă túa pơkâ “Tơdah Têt, hơniâp ro rơnó Hơngui la ôh tá ăm pơreăng COVID-19 mot tung hngêi”.

Tung mâu hâi vâ chê Têt, tung hngêi ki nếo klêi sơng dêi lế lĕm, mơgrúa ăm krúa lĕm, jâ Y Ger 52 hơnăm, pơlê Đăk Rơ Đe, cheăm Ngọc Bay, pơlê kong kơdrâm Kon Tum ôh tá kơtôa  tơdroăng hơniâp ro tung hiâm mơno drêng kuăn ‘nĕng cháu chái  troh, tơkŭm kơdrâm. Jâ ăm ‘nâi, tung 5 ngế kuăn ai 4 ngế kuăn dêi jâ xuân hiăng lăm pêi cheăng a kong pơlê Bình Dương. Têt kố, kuăn kơdrâi hdrui cho Y Ngọc, 20 hơnăm kô xo dôh, mê tâi tâng mâu ngế tung rơpŏng hngêi châ tơkŭm dêi rơpó.

Pakĭng tơdroăng tơmiât pơkâ dêi jâ Y Ger cho tơkŭm po môi hâi Têt ki tơxâng chôu pâ vâ pơchâi dêi dôh nếo. Ƀă tơdroăng phiu  ro, jâ thế tâi tâng rêm ngế kuăn ‘nĕng ki ối hơngế thế lăm khăm tối tơbleăng inâi tơná a hngêi pơkeăng, klêi mê pêi pro tơdroăng klâ krê xêh tung hngêi tro tiô pơkâ ‘na hbrâ mơdât pơreăng COVID-19.  Hlo mâu kuăn ‘nĕng mo lĕm châ mơhé vâ ai pơreăng COVID-19 jâ Y Ger hmiân tuăn, hâk ro păng ‘nâng:

“Rêm ngế xuân ối a hngêi ro ‘nâng, hơniâp tung tuăn. Têt kố mơngế Rơteăng ngin xuân kâ í, kâ pêap, kâ kơ-ƀăn ték. Têt xuân púi vâ ivá mo sêi, trâm pon mơhúa, ngế ki lâi xuân hơniâp ro. Jâ xuân púi vâ to lâi ngế kuăn tơná tung hơnăm nếo kố ah pêi cheăng kâ  pon mơhúa, rêh ối tơniăn, liăn khế châ to hên há’’.

Vâ kuăn pơlê tơdah Têt, hơniâp ro sôk suâ hlối tơniăn mơhé ai pơreăng tâ tú, ing hdrối nah Têt Lo hơnăm nếo kơvâ ngăn pơkeăng xuân môi tiah mâu kăn mâu kong pơlê, tơring, cheăm mơdêk hnoăng cheăng hnê tối vâ kuăn pơlê hlê ‘nâi hbrâ mơdât pơreăng COVID-19. Ing mê, tung lối 2.800 tôh hbrâ mơdât pơreăng tung kuăn pơlê, Khu ngăn kuăn pơlê 756 thôn, pơlê, tôh kơphô̆ tung kong pơlê lăm pôu tơrêm hngêi hnê tối kuăn pơlê rak vế pêi pro mâu pơkâ ƀă tơdroăng hbrâ mơdât pơreăng.

Pôa Đinh Ngọc Hải, Kăn hnê ngăn Vi ƀan cheăm Đăk Ruồng, tơring Kon Rẫy, ăm ‘nâi kơnôm mơdêk tơdroăng hnê tối, kuăn pơlê tung cheăm hiăng ‘nâi plĕng hbrâ mơdât pơreăng cho tơdroăng hâk mơnê khât:

“Mâu kăn kong pơlê hnê tối, mơhnhôk kuăn pơlê pêi tro tơdroăng hbrâ mơdât pơreăng. Nôkố tơdroăng tơkŭm krâm mơngế, kuăn pơlê hiăng ‘nâi thế truâ kên pâng rơkong môh. Mâu kăn cheăm tơring rơtế ƀă mâu khu râ, kơvâ cheăng tơkŭm hbrâ mơdât pơreăng pro tơ’lêi hlâu ăm kuăn pơlê châ kâ Têt tơniăn hơniâp ro ƀă hbrâ mơdât pơreăng”.

Tung pơla dế ai pơreăng COVID-19 tâ tú, mâu hâi vâ chê Têt,  lăm troh ngăn mâu thôn pơlê kơpong hngế hngo dêi kong pơlê Kon Tum xuân tâ ai tơdroăng phiu ro Têt. Vâ hmâ ƀă tơdroăng ki hmâ nếo, kuăn pơlê tơkŭm po hâi leh lŭm kơ-ƀăn tơxông ôh tá tơkŭm krâm mơngế, xing xoăng ăm tơrêm rơpŏng lơ khu rơpŏng pêi pro tiô tơrêm tơdroăng.

Drêng xing xoăng tơmeăm Têt, xoăng kơƀăn tơxông ăm mâu rơpŏng kuăn pơlê mê athế rak tơniăn ‘na tơdroăng hbrâ mơdât pơreăng, ối kơtăn hơngế dêi rơpó vâ kơ tơniăn. Pôa Đào Duy Khánh, Kăn hnê ngăn tơring Kon plông ăm ‘nâi:

“Ƀă tơring Kon Plông mê a mâu pơlê kuăn pơlê ‘nâi rak vế hbrâ mơdât pơreăng. Ngin hnê tối, mơhnhôk mâu rơpŏng pâk vaccine tŭm vâ pêi pro tiô tơdroăng pơkâ 5k tiô troăng hnê mơhno dêi Khu xiâm ngăn pơkeăng pơlât vâ tơniăn hâi Têt ôh tá ai ngế ki lâi ôh tá châ kâ Tết’’.

Klêi hên hơnăm tơdah Têt xua ôh tá tơniăn dêi pơreăng COVID-19, Têt hơnăm kố mơhé pơreăng ối tâ tú rơ-iô la tuăn tơmiât dêi kuăn pơlê kong pơlê Kon Tum hiăng phá tơ ê. Ƀă tâi tâng kuăn pơlê hiăng châ pâk 2 trum vaccine hbrâ mơdât pơreăng, ƀă tơdroăng ‘nâi nhên hlê, ‘nâi tơmiât pêi pro rak pơkâ hbrâ mơdât pơreăng ăm tơná xuân môi tiah kuăn pơlê, mê kuăn pơlê a Kon Tum dế tơkôm chôu phut tâi hơnăm ton vâ lo hơnăm nếo ƀă tơdroăng pơkâ: “Tơdah Têt ro rơnó Hơngui la mơ-eăm ôh tá ăm pơreăng COVID-19 mot tung hngêi.

Khoa Điềm chêh

Gương tơplôu ƀă tơbleăng