VOV4.Xơ Đăng - A kơpong Tây Nguyên, pơreăng COVID-19 dế tâk rĕng a Dak Lak ƀă Lâm Đồng. Tiô Tíu xiâm séa ngăn mơdât pơreăng kong pơlê Dak Lak, troh 16 chôu  hâi lơ 21/02, lâp tung kong pơlê ai 988 ngế tâ COVID-19 ƀă 3 ngế hlâ. Riân tung 1 măng tĭng achê kố, Dak Lak xuân hiăng ai ngế tâ pơreăng hên má môi riân sap ing nah troh nôkố, ai 4.145 ngế. Tâi tâng vâi ‘nĕng mầm non ƀă hok tro sap lâm 1 troh lâm 6 hiăng pơtê hriâm a hngêi trung, vêh hriâm tung Internet nếo ƀă hriâm túa ki ê.

Môi khu tŏng kum pơlât F0 a hngêi krê a Dak Lak

A Lâm Đồng, pơreăng COVID -19 xuân tâk ó ƀă 2.364 ngế tâ tú tung măng tĭng hdrối, tung hâi lơ 21/2 ai tơ’nôm 3 ngế hlâ. Khu xiâm ngăn pơkeăng pơlât Lâm Đồng hiăng ai hlá mơ-éa hnê mơhno ăm tíu xiâm ngăn pơkeăng dêi mâu tơring, pơlê kong krâm tung kong kơdrâm tung kong pơlê tí tăng ‘nâi plĕng ăm Vi ƀan pơtêh thế tơdrêng hdrối a mâu hngêi pơkeăng ki lăm pơlât ukố umê, mơjiâng mâu tôh rak ngăn mơngế tâ COVID-19 tung kuăn pơlê vâ tơrŭm ƀă kơvâ cheăng ngăn pơkeăng rak ngăn khât ăm mâu ngế ki tâ pơreăng.

Gương tơplôu ƀă tơbleăng