VOV4.Xơ Đăng - Kơxo lơ 20/12, a Hà Nội, Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơkŭm po hneăng hôp tơpui tơno mơ’no tơdrêng tung um tiô troăng măng internet mơnhên tơdroăng châ tơƀrê pêi pro ƀă thăm po rơdâ tơdroăng Pêi chiâk deăng rơkê hbrâ ví kong prâi pơ’lêh ối tung Tơdroăng tơkêa bro Pơ’lêh pêi chiâk deăng ai tôh. Klêi kơ’nâi 6 hơnăm pêi pro, Tơdroăng tơkêa bro hiăng kum pơ’lêh tơdroăng tôh têa ăm lối 93 rơpâu hectar pêt mơjiâng tơmeăm ối tung 7 kong pơlê, pơlê kong kơdrâm tung lâp tơnêi têa.

Hneăng hôp tơpui tơno ‘na pêi chiâk deăng rơkê hbrâ ví kong prâi hơ’lêh

Tơdroăng tơkêa bro hiăng tŏng kum mơjiâng 49 troăng pêi chiâk deăng rơkê kâi trâng kong prâi hơ’lêh ƀă mâu loăng plâi môi tiah: báu, mâu kơchâi drêh, prá lâi, plâi kâ ƀă loăng plâi ton hơnăm. Tiô pôa Lê Quốc Doanh, Ngế xiâm phŏ pơkuâ ngăn ‘na pêi chiâk deăng ƀă mơnhông thôn pơlê, mâu tơdroăng châ tơƀrê dêi tơdroăng tơkêa bro hiăng kum kal khât tung tơdroăng pêi pro châ tơƀrê Tơdroăng tơkêa bro vêh pơ’lêh kơvâ pêi chiâk deăng xuân môi tiah Troăng pêi ton xŏn mơjiâng hno têa troh hơnăm 2030 ƀă tơmiât pêi troh hơnăm 2050.

A Sa Ly tơplôu ƀă tơbleăng