VOV4.Sêdang - Kơxo lơ 28/6, pôa Nguyễn Hữu Tháp, kăn phŏ hnê ngăn Vi ƀan kong pơlê Kon Tum lăm séa ngăn ki ai khât ‘na tơdroăng ki pơreăng kâ pro tơkrŭn hlá pôm loăng a cheăm Đăk Năng, pơlê kong kơdrâm Kon Tum. A kong pơlê kong kơdrâm Kon Tum châ hlo pơreăng tơkrŭn hlá pôm loăng, ƀă ƀăng tơnêi dâng 187 ha, a 7 to cheăm, bêng.

Kăn pơkuâ kong pơlê Kon Tum lăm séa ngăn pơreăng pro tơkrŭn a hlá pôm loăng a kong pơlê

Cheăm Đăk Năng cho cheăm ai ƀăng tơnêi tro pơreăng kâ hên má môi ƀă 140 ha, tung mê ai 3 ha ki râ ƀă kơxô̆ pơreăng kâ ‘nhiê lối tơdế. Châ ‘nâi, kố cho pơreăng châ mơnhên xua virus pro, tâ tú rĕng. Klêi kơ’nâi séa ngăn ki ai khât, kăn phŏ hnê ngăn Vi ƀan kong pơlê Kon Tum cho pôa Nguyễn Hữu Tháp pơkâ thế Khu ngăn chiâk deăng ƀă mơnhông thôn pơlê, mâu kơ koan cheăng tŏng kum kuăn pơlê pơkâ tơleăng, hbrâ mơdât pơreăng ki pro tơkrŭn a hlá pôm loăng.

Ƀă ƀăng tơnêi ki pơreăng kâ ‘nhiê ó athế chôu tro tiô pơkâ kih thuât; ƀă ƀăng tơnêi ki tâ iâ, athế pui tah lôi mâu xiâm ki tro pơreăng kâ, vâ kơdroh iâ pơreăng tâ tú troh xiâm ki ê.

Katarina Nga tơplôu ƀă tơbleăng