VOV4.Xơ Đăng - Pơreăng COVID-19 tâ tú rơ-iêo a hên kong têa tung lâp plâi tơnêi, xuân môi tiah a tơnêi têa pin, tung pơla hdrối kố nah, mâu kong pơlê ai tơdjuôm troăng tơkăng kong ƀă kong têa Kul hiăng ai hên troăng hơlâ pơkâ pêi pro ai pơxúa tơƀrê, veăng kum mơdêk hbrâ mơdât pơreăng, rak ngăn krá tơniăn troăng tơkăng kong. Ƀai chêh tối a kong pơlê An Giang prếi Đồng Tháp.

Tiô pôa Trần Hòa Hợp, Kăn hnê ngăn Vi ƀan tơring An Phú, kong pơlê An Giang, tơring ki ai troăng tơkăng kong xŏn 40 km, tơkoh ƀă tơring Angkor Bourei, Bourei Cholsar, Koh Thum ối tung kong pơlê Kandal prếi Takeo, kong têa Kul. Hlo tơdroăng ki tâ tú dêi pơreăng COVID-19 dế tâ tú rơ-iêo, An Phú châ ngăn cho tíu ki xiâm ‘na tơdroăng ki pro xôi tơdroăng pơkâ tơkăng kong. Riân troh sap ing apoăng hơnăm troh nôkố, mâu khu lêng ki ai tơdjâk hiăng châ hlo ƀă hbrâ mơdât lối 700 ngế ki mot tung tơnêi têa ôh tá tro luât.

Pêi pro tiô tơdroăng pơkâ ôh tá ăm kuăn pơlê mot tung tơnêi têa ôh tá tro luât, ôh tá ai pơreăng tâ tú tung kuăn pơlê, drô troăng tơkăng kong khu ki ai tơdjâk troh xuân dế rak vế tơdroăng ki hbrâ mơdât a troăng prôk ƀă troăng têa kroăng. Pôa Trần Hòa Hợp ăm ‘nâi tơ’nôm:

“Ngin hiăng mơhnhôk tơdroăng tâi tâng kuăn pơlê hbrâ mơdât pơreăng. Klêi kơ’nâi tối tơbleăng tơdroăng mê kuăn pơlê hlo ki pơxúa, hnoăng cheăng pôu râng dêi tơná tung hbrâ mơdât pơreăng; teăm châ hlo, hbrâ mơdât, pơsăm tối mâu ngế ki ôh tá kơnó mâ, malối cho mâu ngế ki mot tung kong pơlê ôh tá troh luât sap ing Kul mot tung tơring”.

Vâ hbrâ mơdât tơdroăng ki mâu ngế mot tung kong pơlê ôh tá tro luât, tơdrêng amê hnối pêi pro tro hnoăng cheăng hbrâ mơdât pơreăng, pakĭng tơdroăng ki pêi pro kơtăng gak ngăn troăng tơkăng kong, tung pơla achê kố, tơring An Phú hiăng tơbleăng tơdroăng tơ’noăng tâi tâng kuăn pơlê veăng hbrâ mơdât pơreăng COVID-19 “rêm ngế kuăn pơlê cho môi ngế lêng”, kum khu kăn pơkuâ tơring châ hlo mâu ngế ki prôk lăm tơkâ luâ tíu tơkăng kong ôh tá tro luât, hbrâ mơdât pơreăng COVID-19 tơdjâk troh kuăn pơlê. Ngoh Nguyễn Minh Trí, môi ngế kuăn pơlê a cheăm Vĩnh Hội Đông, tơring An Phú ăm ‘nâi.

“Á cho kuăn pơlê athế ai hnoăng cheăng pôu râng. Á veăng tung tôh lăm pơtrui ngăn dêi tơring hiăng châ lối môi khế kố vâ rak vế ivá kuăn pơlê ƀă khu kăn pơkuâ ƀă ăm dêi tơná á”.

Tơdroăng ki mâu ngế mot tung tơring ôh tá tro luât sap ing kong têa Kul mot tung Việt Nam ing kong pơlê An Giang, chiâng pro ai pơreăng tâ tú mot tung kong pơlê drêng lâi ôh tá ‘nâi. Ƀă tơdroăng “ôh tá ăm kuăn pơlê mot tung kong pơlê ôh tá tro luât, kô ôh tá ai pơreăng tâ tú tung kuăn pơlê”, kăn ƀô̆ lêng a mâu tíu gak, tơkŭm lăm pơtrui ngăn, plâ hâi plâ măng, rak ngăn krá tơniăn a bo cheăng, mâu troăng prôk tung kong, troăng ki prôk rĕng troh, hno têa ing troăng tơkăng kong hbrâ mơdât vâ mâu ngế ki mot tung kong pơlê ôh tá tro luât ing troăng tơkăng kong. Ngoh Trần Minh Chiến, kăn phŏ pơkuâ Khu pơkuâ ngăn lêng cheăm Vĩnh Hội Đông, tơring An Phú ăm ‘nâi tơ’nôm.

“Ƀă hiâm mơno ki kơhnâ, pôu râng hnoăng cheăng. Tôh klâ pro 2 khu, môi khu lăm troh a kơtâu Vĩnh Hòa, khu ki lăm troh a cheăm Vĩnh Ngươn vâ rak tơniăn tro ăm tơdroăng ki hbrâ mơdât pơreăng”.

Tối ‘na mâu tơdroăng ki xơpá dêi khu lêng ki veăng lăm pơtrui ngăn, Đăi ŭi Chau Ône, kăn phŏ pơkuâ Đông mố đô̆i gâk tơkăng kong Vĩnh Hội Đông, Mố đô̆i gâk tơkăng kong dêi kong pơlê An Giang ăm ‘nâi:

“Măng muât tơdjâk troh tơdroăng ki séa ngăn ƀă mâu khu lêng ki veăng lăm pơtrui, má péa nếo cho trâm kong mêi khía gá xơpá khât. La ƀă tơdroăng ki khŏm mơ-eăm khât dêi khu lêng ngin hiăng teăm mơhnhôk dêi rơpó, tơkŭm séa ngăn pơtrui rak tơniăn a mâu kơpong”.

Kong pơlê Đồng Tháp ai lối 50 km troăng tơkăng kong tơkoh ƀă kong pơlê Pray-veng, kong têa Kul, tung mê ai 2 to bo cheăng kong têa cho Thường Phước ƀă Dinh Bà. Tơnêi tơníu ôh tá tơniăn ƀă mâu hno têa, hên hĭn, hên tíu ki kŭn mê gá tơ’lêi ăm mâu ngế ki ‘mêi hmuâ ối, hêak kơ mâu khu ki ai tơdjâk troh.

Ngoh Nguyễn Quốc Triệu, lêng kuăn pơlê dêi cheăm Thông Bình, tơring Tân Hồng tối, khu lêng ƀă kuăn pơlê pêi pro tro hnoăng cheăng tŏng kum mâu khu lêng ki ê a mâu tíu gâk ‘nâi tơdroăng, teăm châ hlo ƀă pơxâu phâk mâu ngế krê, tôh tơrŭm pêi pro lơ ai tơdroăng ki vâ tŏng kum kơtôa ăm mâu khu ‘mêi, tơdah xo mâu ngế ki mot tung kong pơlê ôh tá tro luât.

“Séa ngăn mâu rơxế ki prôk tơkâ luâ, hnê khĕn kuăn pơlê truâ kên pâng môh rơkong, jiếo kŏng ƀă têa kơdê pơreăng, tâng hlo ngế ki tơviah prôk tơkâ luâ mê séa ngăn kôp rơxế, hlá mơ-éa vâ hbrâ mơdât pơreăng COVID ƀă mơdât tơdroăng ki mot tung kong pơlê ôh tá tro luât”.

Pôa Nguyễn Văn Cọp, kăn hnê ngăn Vi ƀan cheăm Thông Bình, tơring Tân Hồng, ăm ‘nâi, tung pơla achê kố, khu kăn pơkuâ hiăng rơtế ƀă mâu khu lêng pêi hnoăng cheăng hbrâ mơdât pơreăng a troăng tơkăng kong, mơdêk hnoăng cheăng hnê tối, mơhnhôk kuăn pơlê pêi pro mâu troăng hơlâ hbrâ mơdât pơreăng COVID-19, ôh tá tŏng kum mâu khu ki ‘mêi mot tung kong pơlê ôh tá tro luât, khên tơnôu pơsăm tối drêng châ hlo mâu ngế ki pro xôi tíu tơkăng kong châ khu kăn pơkuâ ƀă khu lêng ki ai tơdjâk troh pêi pro đi đo.

“Troh nôkố ‘na hnoăng cheăng hnê tối mê athế tối tiah kố kuăn pơlê dêi kong pơlê ai hiâm mơno, hlê plĕng khât ‘na hnoăng cheăng hbrâ mơdât pơreăng. Malối cho bă mâu ngế ki tơviah troh a kong pơlê mê pakĭng tơring châ hlo mê kuăn pơlê xuân châ ‘nâi ƀă tối tơbleăng tơdrêng”.

Mâu kong pơlê ki ê môi tiah Kiên Giang prếi Cà Mau xuân hiăng tơbleăng ƀă pêi pro tro hnoăng cheăng tơrŭm pơtrui ngăn mâu ngế ki prôk tơkâ luâ; vâ rĕng châ hlo ƀă pơkâ tơleăng tơdrêng mâu ngế ki mot tung tơring ôh tá tro luât tâng ai tung pơla kố.

Laga, pơreăng nôkố xuân dế tâ tú rơ-iêo, tơpá vâ ‘nâi hdrối, la drêng khu lêng ƀă kuăn pơlê tơdjuôm ivá mê xơpá troh dâng lâi xuân tơkâ luâ. Tung rôh hbrâ mơdât pơreăng kân ki xơpá, hiâm mơno tơrŭm mê môi hdroh nếo châ mơdêk. Pơla kong măng a kơpong tơkăng kong hngế hngo, khu lêng ƀă kuăn pơlê tơdjuôm môi tơdroăng tơmiât a môi to troăng hbrâ mơdât pơreăng. Tâi tâng xua hâi kơxo ah bâ eăng tâ, tơniăn lĕm tâ.

VOV4 chêh

Katarina Nga tơplôu ƀă tơbleăng