VOV4.Xơ Đăng - Kơxê lơ 3/12, Khu râ kăn pêi cheăng dêi Khu xiâm pơkuâ ngăn pơkeăng ƀă khăm pơlât, Ƀơrô Kuô̆k hô̆i ƀă Hô̆i đong ngăn kuăn ngo dêi Kuô̆k hô̆i hiăng ai roh pêi cheăng a kong pơlê Dak Lak ‘na tơdroăng hbrâ mơdât pơreăng COVID-19 ƀă séa ngăn, mơnhên tơdroăng ki chiâng pêi pro tơdroăng tơkêa bro mơjiâng Hngêi pơkeăng kân xiâm tơnêi têa kơpong Tây Nguyên.

Ngế xiâm pơkuâ ngăn pơkeăng ƀă khăm pơlât xông tơpui a roh pêi cheăng

Xông tơpui a roh pêi cheăng, Kăn xiâm pơkuâ ngăn pơkeăng ƀă khăm pơlât mơnhên, Dak Lak hiăng ai mâu tơdroăng mơ-eăm ƀă pêi tơtro tơdroăng hbrâ mơdât pơreăng COVID-19, kong pơlê hiăng tơmiât nhên ƀă pêi tơtro. Ing mê, kum kơdroh kơxô̆ mơngế hlâ xua tro tâ COVID-19 dêi kong pơlê Dak Lak a kơlo ki iâ, bu dâng 1/5 tâng pơchông ƀă tơdâng tơdjuôm lâp tơnêi têa, kong pơlê kô rĕng djâ tơdroăng tiah hmâ nếo.

‘Na tơdroăng tơkêa bro mơjiâng Hngêi pơkeăng kân xiâm Tơnêi têa kơpong Tây Nguyên, Ngế xiâm ngăn ‘na pơkeăng ƀă khăm pơlât tối ăm ‘nâi, to Tây Nguyên tê tá hâi ai mê tâi tâng mâu kơpong pơrá hiăng ai hngêi pơkeăng ki má môi dêi Khu xiâm. Tây Nguyên pơtối cho kơpong ki tá hâi ai tŭm ‘na ki hôm păng ‘nâng tung kơvâ khăm pơlât, tơdroăng mơjiâng hngêi pơkeăng xiâm tơnêi têa cho kal păng ‘nâng.

A Sa Ly tơplôu ƀă tơbleăng