VOV4.Sêdang - A kong pơlê Kon Tum pơreăng êi kéa lo po pom a kơpôu ro pơtối xông tâ tú rĕng. Hâi lơ 17/6, a Đăk Hà, môi tung 6 tơring, pơlê kong kơdrâm dêi kong pơlê Kon Tum ai kơpôu ro tro tâ pơreăng hiăng Pơkâ tơbleăng pơreăng êi kéa lo po pom a kơpôu ro a 2 cheăm Đăk La ƀă Ngọk Wang. Tung pơla ai pơreăng pơtê pơtân mâu tơdroăng tê rôe, pơto kơpôu, ro, kuăn kiâ kong tơ’lêi tro tâ pơreăng êi kéa lo po pom ƀă mâu hơ’nêh kơpôu, ro mot a kơpong ai pơreăng.

Pâk pơkeăng pơlât pơreăng êi kéa lo po pom ăm ro a pơlê kong kơdrâm Kon Tum

Ƀă mâu tơring tá hâi ai pơreăng thế hbrâ xêh ƀă thăm mơdât pơreăng, seá ngăn kơtăng tơdroăng, pơreăng xông tâ tú vâ teăm mơdât tơdrêng tâng lơ ai pơreăng xông tâ tú khât. Tơbleăng ing Tíu xiâm tê mơdró Pêi chiâk deăng tơring Đăk Hà ăm ‘nâ, xêo sap ing hâi lơ 10/6 troh hâi lơ 15/6, tung tơring hiăng châ hlo 18 tíu pơreăng êi kéa lo po pom a kơpôu, ro a 7 thôn dêi 2 cheăm Đăk La ƀă Ngọc Wang ƀă 22 to ro tro tâ pơreăng. Tơdroăng pơreăng châ mơnhên dế pơtối xông tâ tú ó ƀă tơ’lêi tâ tú rơdâ.

Kăn xiâm pơkuâ kong têa Rusi tơbleăng hiăng rơnáu vâ pơtối tơpui tơno ƀă Mih

1.Pôa Vladimir Putin, kăn xiâm pơkuâ kong têa Rusi ăm ‘nâi, kong têa kố hbrâ rơnáu pơtối tơpui tơno ƀă Mih ƀă tơdroăng Mih xuân athế hbrâ rơnáu tơpui tơno. Tơbleăng kố châ mơ’no tối môi hâi klêi kơ’nâi rôh hôp pơla pôa Vladimir Putin prếi pôa Joe Biden, kăn xiâm pơkuâ kong têa Mih po a Geneva, kong têa Swiss. Klêi kơ’nâi rôh hôp, Rusi prếi Mih hiăng mơ’no rơkong tối tơbleăng tơdjuôm ‘na tơniăn tung la ngiâ.

Tơbleăng tơdjuôm kố ai chêh “Tơdroăng ki mơdon tơ’nôm Tơkêa ju kơdroh xúa pháu hnêa trếo pơtôu tung la ngiâ nếo (NEW START) achê kố cho môi tung tơdroăng ki mơhno tối ăm tơhrâ dêi péa kong têa tung hbrâ mơdât xúa pháu hnêa, trếo pơtôu ai krâ trếo tik nik.

Tiô tơdroăng ki tơbleăng tơdjuôm, vâ tơpui châ rơhéa mâu pơkâ kố, Rusi prếi Mih kô rĕng pơxiâm po rôh tơpui tơno pơla péa pâ, ai pơxúa tơdrăng ‘na tơniăn tơdroăng cheăng tung la ngiâ.

Katarina Nga tơplôu [ă tơbleăng