VOV4.Xơ Đăng - Kơxo lơ 6/12, Hngêi pơkeăng kân kong pơlê Kon Tum hiăng tơbleăng mơ-éa ăm khu chêh hlá tơbeăng ‘na 8 ngế tro tâ COVID-19 châ hlo a hngêi pơkeăng sap ing hâi lơ 2 – 4/12. Pơtối mê, tung 8 ngế F0 ai 2 ngế cho pêi cheăng tung hngêi pơkeăng, mê cho 1 ngế ƀok thái pơkeăng ƀă 1 ngế điêu yương. 6 ngế F0 ki ê, ai: 3 ngế hngêi a pơlê kong kơdrâm Kon Tum, tơring Sa Thầy ƀă Kon Rẫy; 1 ngế kơdrâi dế mơ-êa ƀă nhŏng o ngế kơdrâi dế mơ-êa a tơring Đăk Hà ƀă 1 ngế nhŏng o dêi ngế châi tamo a tơring Sa Thầy.

Hngêi pơkeăng kân kong pơlê Kon Tum tíu châ hlo 8 ngế F0

Tâi tâng mâu ngế F0 châ hlo tung Hngêi pơkeăng kân kong pơlê Kon Tum hiăng djâ troh tíu klâ kơtăn pơlât a Hngêi pơkeăng pơtân kơxô̆ 1 kong pơlê Kon Tum. Klêi kơ’nâi châ hlo 8 ngế F0, Hngêi pơkeăng kân kong pơlê Kon Tum tơkŭm ti tăng mơngế ki tơdjâk, klâ kơtăn mâu ngế F1, F2; thăm mơgrúa hngêi a mâu khoa ai ngế tro tâ COVID-19; pêi pro krá tơniăn tơdroăng pơkuâ mơngế păn roăng mơngế châi tamo mot tung Hngêi pơkeăng; đi đo mơdât tâ tú ƀă mơngế châi tamo, mơngế ki rak ngăn ƀă tâi tâng thái pơkeăng, ƀok thái pơkeăng.

A Sa Ly tơplôu ƀă tơbleăng