VOV4.Sêdang - Nôkố, tâi tâng kơpôu, ro dêi kong pơlê Kon Tum ai lối 100 rơpâu to, vâ châ tơdế tung kơxô̆ ki mê xua vâi krâ nhŏng o hdroâng kuăn ngo păn tiô túa ki kơ’nêi hmâng vâ, pro tơdroăng ki hbrâ mơdât pơreăng ƀă tơbleăng pâk vaccine trâm hên xơpá. Hlo tơdroăng ki ai a mâu tơring, cheăm hiăng hlo ai mâu tíu pơreăng hbáu mông, tơlŏng kơchup chêng a kơpôu ro, pơreăng êi kéa ki po pom ƀă mơheăm tơkŭm a kơpôu, ro mê Vi ƀan hnê ngăn kong pơlê pơkâ thế Khu ngăn chiâk deăng ƀă mơnhông thôn pơlê rơtế ƀă kong pơlê mơdêk pơkâ mâu troăng hơlâ hbrâ mơdât ăm mâu kơpôu, ro.

Rơtế ƀă tơdroăng ki tơbleăng tung um tơvi, rơ’jiu, mơdêk ki hlê plĕng ăm kuăn pơlê ‘na păn rak tơniăn sinh hok, Vi ƀan hnê ngăn kong pơlê pơkâ thế mâu tơring, cheăm pơtối séa ngăn, riân khu kơpôu, ro ki tro pơreăng, vâ prâu tah, vê hdró ƀă mâu tíu ki nếo ai pơreăng, tơdrêng  amê hnối hbrâ mâu túa ki pâk vaccine ăm khu kơpôu ro.

Katarina Nga tơplôu ƀă tơbleăng