VOV4.Sêdang - Pôa Nguyễn Như Cường, kăn xiâm rak ngăn Pêt mơjiâng kế tơmeăm ối tung khu xiâm ngăn chiâk deăng ƀă Mơnhông thôn pơlê ăm ‘nâi, nôkố tung lâp tơnêi têa ai dâng 659 rơpâu ha tơnêi pêt kơphế, kloăng kơphế châ lối 1,7 rơtuh tâ̆n/hơnăm. Tung mê, kơpong Tây Nguyên ai 585 rơpâu ha, kloăng châ lối 1,6 rơtuh tâ̆n. Tung pơla hdrối kố nah, pơreăng COVID-19 tâ tú rơ-iêo, ai mâu tíu ki ‘nâi pêi pro klâ ối krê pơlê hiăng tơdjâk troh tơdroăng ki rak ngăn, kơphế a mâu kơdrum deăng.

Nôkố, yă kơphế dế hlo tâk la xua tơdjâk dêi pơreăng, ôh tá ai ngế krí, kơxô̆ liăn ‘no hên ƀă hên tơdroăng ki ê pro tâi tâng mâu ngế ki pêt kơphế ƀă khu mơdró kâ pơrá trâm pá drêng pơxiâm mot tung rơnó krí. Dak Lak cho kong pơlê ki ai ƀăng tơnêi pêt kơphế hên má môi tung lâp tơnêi têa. Hơnăm kố, xua tơdjâk dêi pơreăng COVID-19, tơdroăng ki prôk lăm pơla mâu kong pơlê ki kố ngi kong pơlê ki tá trâm hên xơpá mê a mâu kong pơlê ôh tá ai ngế ki krí kơphế.

Katarina  Nga tơplôu ƀă tơbleăng