VOV4.Xơ Đăng - Mot tung rơnó pôe xo tơmeăm hơnăm 2021, yă pía kái kơdrâ kơdroh ó chu u ối pá kơdâm 3.000 liăn/1 kilô. Tơdroăng ki kố pro hên kuăn pơlê pêi chiâk deăng pêt pía kái a Gia Lai tro lŭp hnoăng, lŭp liăn mơ’no rak ngăn. Nôkố, a kong pơlê Gia Lai ai lối 1.000 hectar pía kái, tơkŭm a mâu tơring Krông Pa, Phú Thiện, Ia Pa, Chư Prông ƀă hía hé. Rơnó pía kái hmâ pêt mơjiâng tung 3 khế mơ’nui hơnăm, kuăn pơlê thế pro hơkôp a chiâk deăng vâ rak ngăn tơbrêi tơbrêh.

Kuăn pơlê thế pro hơkôp, ối kâ a chiâk deăng tung 3 khế vâ rak ngăn pía kái

Hơnăm kố, yă pía kái kơdroh ó, pro tơdroăng ki pá puât mê hiăng ôh tá châ kum tơxâng. Pôa Nguyễn Tuấn Anh – Kăn phŏ hnê ngăn Vi ƀan cheăm Ia Mơr, tơring Čư̆ Prông tối ăm ‘nâi: rơnó kố hơnăm nah yă sap ing 6.000 rơpâu troh 7.000 rơpâu liăn/1 kilô mê kuăn pơlê châ liăn rơkâ. Laga nôkố, yă dâng 2.500 troh 3.000 liăn/1 kilô mê rêm hectar, lŭp châ to lâi chât rơtuh, xua mê pá puât ăm kuăn pơlê, pói tơngah ai troăng hơlâ tŏng kum môi iâ.

A Sa Ly tơplôu ƀă tơbleăng