VOV4.Xơ Đăng - Ƀă hiâm mơno kơhnâ, kâi chiu ƀă mâu tơdroăng ki xơpá, ƀĕng ƀeăn tung cheăng kâ tê mơdró, pôa Phạm Ngọc Thân, ối a thôn 4, cheăm Tân Hòa, tơring Ƀuôn Đôn, kong pơlê Dak Lak hiăng châ hiăng pơ-eăng cho môi tung 63 ngế kuăn pơlê ki pêi chiâk deăng tê mơdró rơkê dêi lâp tơnêi têa hơnăm 2021. Ôh ti xê to rơkê cheăng kâ tê mơdró, mê pôa ối cho ngế ki djâ troăng ahdrối tung tơdroăng ki tŏng kum hên ngế kuăn pơlê pêi chiâk deăng mơeăm hluăn ing kơtiê ƀă kơhnâ veăng mơjiâng thôn pơlê nếo xuân môi tiah tŏng mâu ngế ki ai tơdroăng rêh ối xơpá a cheăm, tơring.

Ngoh Hoàng Đức Dũng, ối a thôn 6, cheăm Tân Hòa đi đo pâ mơnê pôa Phạm Ngọc Thân, xua châ tơdah xo mot pêi cheăng a tíu tê mơdró tơmeăm mơjiâng pro hngêi ƀă kơlo liăn khế 6 rơtuh/môi khế. Ôh tá xê to tiah mê, pôa Thân ối ăm rơpŏng ngoh Dũng mung liăn ôh tá xo liăn rơkâ vâ păn pu pái mơnhông cheăng kâ. Tơdah kơxô̆ liăn mung ing pôa Thân ngoh rôe 8 câp pu pái vâ păn. Roh kố, ngoh Dũng pơtối châ tơƀrê. Păn châ liăn rơkâ, rơpŏng hiăng mơdrếo liăn chĕn ki xiâm ƀă ai 1 toăng hngêi kân rơdâ 70 met karê, ai liăn păn kuăn ‘nĕng hriâm tâp.

‘’Á mot pêi cheăng ăm mêh Thân sap ing lối 5 hơnăm hdrối. Kơ’nâi mê á ai mung liăn meh 100 rơtuh liăn vâ rôe pu pái păn, kơ’nâi mê pu pái ai kuăn mê tê môi iâ rôe ro păn, ai liăn vâ rôe tơmeăm khoăng tung tơdroăng rêh ối. Pêi lo liăn nôkố tơniăn. Pakĭng liăn khế lối 70 rơtuh liăn ing pôa Thân, mê pêi lo liăn ing ro ƀă pu pái xuân châ to lâi chât rơtuh nếo, akop mê lối 100 rơtuh liăn. Rơpŏng ai liăn mơjiâng pro hngêi, ai liăn ăm kuăn ‘nĕng lăm hriâm’’.

Châ pôa Phạm Ngọc Thân kum, hên rơpŏng pá puât a tơring Ƀuôn Đôn ƀă kơpong achê mê hluăn ing kơtiê, thăm nếo mơ-eăm pro kro mơdrŏng

Pôa Tô Văn Liệu – Kăn phŏ hnê ngăn kuăn pơlê pêi chiâk deăng tơring mơnhên, mâu hơnăm hiăng hluâ pôa Phạm Ngọc Thân ôh tá xê to pêt mơjiâng tơmeăm, tê mơdró rơkê, mê ối cho ngế kơhnâ veăng tung mâu tơdroăng pêi cheăng, tơdroăng tơ’noăng xua mâu khu râ Khu pơkuâ kuăn pơlê pêi chiâk deăng mơhnhôk pêi pro; veăng kum tung mâu tơdroăng mơjiâng tơmeăm, hngêi trăng troăng klông mơjiâng thôn pơlê nếo a pơlê; tơdrêng amê pôa xuân kơhnâ veăng, hnê khoa hok kih thuât păn mơnăn mơnôa, pêt tơmeăm khoăng ăm hrĭng khu tơrŭm ki ê a tơring Ƀuôn Đôn; ăm kuăn pơlê mung phon, pơkeăng rak vế hdrê kơchâi plâi pôm ƀă ôh tá xo liăn rơkâ ăm mâu rơpŏng kơtiê ƀă hía hé.

Ƀă tơdroăng tŏng kum dêi pôa Phạm Ngọc Thân, hên khu tơrŭm cheăng a cheăm Tân Hòa ƀă kơpong ki achê mê hiăng hluăn ing kơtiê, thăm nếo mơ-eăm pro kro mơdrŏng.

‘’Pôa Thân hiăng tŏng kum thôn 4 cheăm Tân Hòa pro Hngêi hôp tơdjuôm thôn, rơnêu mâu troăng kân drô thôn pơlê. Tơdrêng amê veăng tơlo liăn kum hên rơpŏng ki pá puât ki ê a cheăm lơ pơlê kong kơdrâm Ƀuôn Ma Thuột, mơjiâng hơniâp tuăn pâ a Hngêi pơkeăng tơring Ƀuôn Đôn vâ mơngế kơtiê ai hmê kâ; diâp kơxuô tơmeam ăm vâi hdrêng kơtiê châ troh hriâm a hngêi trung. Khu pơkuâ kuăn pơlê pêi chiâk deăng tơring dế pơtối po rơdâ troăng pêi ki má môi vâ troh lâp lu tung pơlê pơla, hên rơpŏng kơtiê pơtối châ tŏng kum lơ châ kum’’.

Pôa Phạm Ngọc Thân cho môi tung 63 kuăn pơlê pêt mơjiâng tơmeăm tê mơdró rơkê phiu ro châ tơdah ƀâng kheăn kơdeăn ing Kăn xiâm hnê ngăn Kuô̆k hô̆i

Nếo achê pơla kố, pôa Phạm Ngọc Thân hiăng tơdah inâi ‘’Kuăn pơlê pêi chiâk deăng – tê mơdró rơkê Lâp tơnêi têa hơnăm 2021’’. Pôa Thân tối, pôa xuân pơxiâm tăng cheăng pêi ing 2 kơpeăng kŏng ôh tá ai ki klâi, thế lăm pêi cheăng vâi, lăm mung liăn, xuân chôa ‘lâng xông tơtêk ing pêt mơjiâng kơphế, tiu, păn ro. Laga vâ mơnhông mơdêk, pôa hiăng khên tơnôu mơnúa pêi. Ing tê mơdró têa châu têa kơxăng, tơmeăm mơjiâng pro hngêi, phon rơvât ƀă pơkeăng rak vế hdrê kơchâi plâi pôm, klêi mê po kơdrum pêt plâi treăng kêt dro, mơjiâng pro hngêi păn chêm pơlêng hngêi ƀă hía hé.

Châ tơƀrê păng ‘nâng, nôkố pôa hiăng ai hngêi tê mơdró tơmeăm ƀă kơdrum loăng plâi, pêi lo liăn lối 15 rơtuh liăn môi hơnăm. Rế pêi, rah tơdroăng pêi cheăng, tơmiât nhên, pôa Phạm Ngọc Thân ai tơmiât tơdroăng pêi cheăng kâ kân tâ mê. Pôa ôh tá pơtê a tơdroăng cheăng kâ rơpŏng, mê kô tơdjêp ƀă hên rơpŏng ki ê po tơmeăm ki ai dêi kơpong tơnêi Ƀuôn Đôn.

‘’Ngin xuân tơtrŏng tung tơdroăng rak tŏng kum mơ’no liăn ăm kuăn pơlê pêi chiâk deăng. Á ối dế tơmiât la ngiâ rơpŏng ƀă mâu kuăn pơlê tung thôn po rơdâ păn chêm pơlêng, mơjiâng tơmeăm ing chêm ki krúa tiô pơkâ OCOP vâ tê tung kơchơ tê mơdró lâp plâi tơnêi. Má péa, á xuân dế rơtế kơvâ pêi chiâk deăng dêi tơring mơjiâng Khu tơrŭm pêt mơjiâng tơmeăm tê mơdró plâi treăng kêt dro tung ƀăng kân rơdâ a cheăm Tân Hòa. Á pói tơngah tŭm tơdroăng cheăng kô tơ’lêi ƀă châ tơƀrê’’.

Ƀă mâu tơdroăng châ tơƀrê tung pêt mơjiâng tơmeăm tê mơdró xuân môi tiah tơdroăng tŏng kum mơngế pá puât, hên hơnăm hiăng hluâ, pôa Phạm Ngọc Thân hiăng châ mâu khu râ a Dak Lak diâp hên inâi; ki rơhêng vâ tối tung hơnăm 2021 kố, pôa cho môi tung 63 kuăn pơlê pêi chiâk deăng pêt mơjiâng tơmeăm tê mơdró rơkê lâp tơnêi têa phiu ro châ pôa Vương Đình Huệ, Kăn xiâm hnê ngăn Kuô̆k hô̆i kheăn kơdeăn. Pôa châ mơnhên ôh tá xê to tơdroăng mơ-eăm tơkâ hluâ pá puât pro kro mơdrŏng, xua ai hiâm mơno lĕm hbrâ kum kuăn pơlê tung pơlê, xuân ai troăng tơmiât pêi la ngiâ ƀă tơdroăng ki khŏm mơ-eăm rơtế khu râ kăn pơkuâ tơring  ƀă kuăn pơlê tung tơring, cheăm, pro kơpong tơnêi pá puât pơlê xiâm tơná chiâng kơpong pêi chiâk deăng tŭm túa ƀă kơdrâm mơngế, kro mơdrŏng.

Tuấn Long chêh

A Sa Ly tơplôu ƀă tơbleăng