VOV4.Sêdang - Vâ mơdêk châ tơƀrê cheăng kâ ƀă chôa ‘lâng pêt hên loăng plâi, tơring Cát Tiên, Lâm Đồng dế thăm po rơdâ ƀăng pêt kơchâi drêh.  Nôkố tơring hiăng mơjiâng kơpong pêt kơchâi drêh ƀă ƀăng 524 ha drô kĭng têa kroăng Đồng Nai. Mâu kơchâi drêh châ pêt hên má môi a hên tơring Cát Tiên cho: Hơpê ngiât, to prá, pía tâng, rơpeăng ƀă hơlât. Kơnôm tơtro ƀă tơnêi tíu xua mê mâu ƀăng deăng pêt kơchâi drêh drô kĭng têa kroăng Đồng Nai xông ngiât lĕm, iâ tro tâ pơreăng ƀă châ mơnhên cho dâi lĕm.

Rêm hectar pêt pêi lo liăn ăm kuăn pơlê Cát Tiên dâng sap ing 300 rơtuh troh 500 rơtuh liăn rêm hơnăm, hên tâ châ 5 troh 10 xôh tâng pơchông ƀă pêt báu. Nôkố kơvâ pêi chiâk deăng tơring Cát Tiên dế mơhnhôk ƀă tŏng kum ‘na kih thuât, liăn, hdrê vâ mâu rơpŏng ai ƀăng tơnêi drô têa kroăng Đồng Nai pơtối hơ’leh ing mâu loăng plâi ki ê vâ pêt kơchâi drêh tiô troăng xúa kơmăi kơmok rơxông nếo vâ mơdêk pêi lo liăn, hơ’leh tơdroăng rêh ối.

A Sa Ly tơplôu ƀă tơbleăng