VOV4. Xơ Đăng -  Hâi lơ 15/12, kong pơlê Lâm Đồng châ hlo 284 ngế nếo tro tâ COVID-19, cho kơxô̆ ngế tro tâ tung 24 chôu hên má môi sap ing hdrối nah troh nôkố. Tung kơxô̆ 284 ngế nếo tro tâ dêi tâi tâng kong pơlê, 4 tơring ƀă pơlê kong kơdrâm ai hên ngế tro tâ COVID-19 mê cho Đà Lạt, Di Linh, Đức Trọng ƀă Dà Huoai hiăng ai 217 ngế. Tơdroăng pơreăng COVID-19 a Lâm Đồng dế xông tâ tú ó sap ing apoăng khế 12 ƀă vâ chê 2.500 ngế tung tơdế khế, tâk rĕng má môi kơpong Tây Nguyên.

Lâm Đồng: Ngế nếo tro tâ tung môi hâi hên má môi sap ing ai pơreăng

Troh hâi lơ 15/12, lâp kong pơlê ai 5.983 ngế tro tâ COVID-19, tung mê ai 2.864 ngế xuân tung pơla pơlât. Hbrâ mơdât kơxô̆ mơngế tro tâ COVID-19 tâk ó, Khu pơkuâ ngăn pơkeăng ƀă khăm pơlât Lâm Đồng hiăng xing xoăng ăm mah kơxô̆ ăm 3 tíu pơlât COVID-19 ki nếo, ƀă 570 xoăng pơlât, ăm mâu ngế F0 ki ôh tá râ ƀă ôh tá mơhno tơdroăng châi pakong. Tung kơxô̆ mê, ai 2 tíu a pơlê kong kơdrâm Đà Lạt ƀă 1 tíu a tơring Di Linh.

A Sa Ly tơplôu ƀă tơbleăng