VOV4.Sêdang - Xua ai tơdjâk dêi pơreăng kân COVID-19, pơla hdrối kố nah, ki hên kuăn pơlê pêi chiâk dêi kong pơlê Lâm Đồng khoh chiâng trâm tơdroăng xahpá xua ôh tá châ tê mơ’no dêi kế tơmeăm. Vâ hluăn ing tơdroăng pá puât mê, kơvâ ngăn ‘na chiâk deăng kong pơlê Lâm Đồng dế po troăng hơlâ ăm kuăn pơlê khŏm châ pêi pêt, hnối châ tê dêi mâu kơchâi, plâi, pôm tiô kơ tơdroăng rêh ối nếo nôkố.

Tung mâu hâi hdrối mê hiá nah, rơpŏng hngêi nâ Nguyễn Thị Mơ, ối a bêng 8, pơlê kong kơdrâm Đà Lạt, tơkŭm mơgrúa dêi kơdrum reăng vâ pơ’lêh pêt hdrê kơchâi plâi, pôm ki vâ xo dêi ton hơnăm. Nâ Mơ ăm ‘nâi, xua tơdjâk dêi pơreăng kân COVID-19, ki hên tơnêi pêt reăng xo tơkâng hiăng hên hdroh tro lŭp, pêt ôh tá tơtro xếo mê rơpŏng hngêi pơ’lêh pêt hăng  tơvó ki kân ƀă mâu kơchâi plâi pôm ki ê.

“Nôkố mâu kơchâi plâi pôm ki tê pơxiâm to yă, ki pơxúa dêi tơdroăng pêt hăng tơvó ki kân cho châ krí ton khế tâ mê kơxô̆ liăn châ xo chía tâ há tâng vâ pơchông ƀă mâu túa kơchâi, reăng plâi pôm ki ê. Mâu tơmeăm pêt ki ‘no liăn lên la xúa tung pơla iâ hâi kô lŭp hên, ki tro lŭp gá vâ tối troh 80%. Krê hăng tơvó ko kân châ pơxúa luâ tâ péa hdroh la hâi khế pin krí xo dêi plâi ton iâ há . ‘Na mâu túa rĕang môi tiah reăng cúc, reăng cẩm chướng lŭp hên troh 100%”.

Vâ tơtro tung tơdroăng nếo pêt, Lâm Đồng pơ’lêh mâu tơnêi ki pêt reăng xo tơkâng nah nôkố pêt kơchâi, plâi, pôm

Vâ pêt kơchâi, reăng, plâi, pôm tiah hmâ tung pơla dế ai pơreăng COVID-19 tung tơdroăng nếo nôkố, kơvâ ngăn pêi chiâk deăng kong pơlê Lâm Đồng hiăng mơjiâng pơkâ tơkŭm pêt tiô troăng rơhlâ pêt hên iâ gá ai tiô púi vâ dêi mơngế ki rôe, vâ tơniăn tơdroăng pơkâ pêi pêt ƀă tê mơdró tơmeăm pê lo dêi kuăn pơlê.

Tiô pôa Nguyễn Văn Châu, Kăn phŏ pơkuâ ngăn ‘na chiâk deăng ƀă mơnhông mơdêk thôn pơlê dêi kong pơlê Lâm Đồng, pơkâ mê vâ mơhno troăng pêi tiô tơdroăng pơkâ tơtro, tơniăn tiô mâu tíu vâ rôe, tâng riân 6.800 tâ̆n kơchâi, plâi, pôm tŭm túa tung môi hâi. Tung mê, tŏng kum khât tung pơ’lêh tơnêi ing mâu loăng plâi pêt ki ê dế trâm pá môi tiah reăng ki ko xo tơkâng iâ hâi, pơ’lêh pêt kơchâi, pôm, plâi tŭm túa ai hâi khế xông kân iâ tê, tơ’lêi rak ngăn, ăm châ xo ton khế ƀă tơniăn ‘măn rak ton, tơ’lêi tung pơla chơ djâ lăm tê.

Pôa Nguyễn Văn Châu, tối ăm ‘nâi:

“ 2 tơmeăm pêi lo ki tro tơdjâk hên tung pơla dế ai pơreăng COVID-19 hdrối kô nah cho kơchâi, pôm, plâi ƀă reăng. Kong pơlê hiăng tơrŭm ƀă mâu kong pơlê, tơring, cheăm tí tăng ngăn nếo vâ mơjiâng môi pơkâ pêi pêt ăm iâ khế, troăng rơhlâ pơkâ xuân ối rak vế tơdroăng mơdâ pêt tơniăn a tơnêi tíu tiô  tơdroăng hiăng pơkâ.

Tâng riân rêm hâi tê dâng 6 rơpâu 864 tâ̆n kơchâi, pôm, plâi, tơniăn tung pêi pêt dêi kuăn pơlê ƀă ôh tá tro lŭp. Ngin ai pơkâ troăng rơhlâ kơdroh tơnêi pêi kơchâi ki kâ hlá ƀă pơ’lêh iâ tơnêi ki pêt reăng xo tơkâng ki iâ hâi pơ’lêh pêi kơchâi vâ ai kơchâi tê ăm mâu tíu kal vâ pôi tá tro khuô̆t ‘na kơchâi, plâi, pôm ki pin tê ’’.

Tơdrêng amê, hnê mơhnhôk ƀă tŏng kum kuăn pơlê tơkŭm dêi rơpó pêi pêt tiô inâi tơmeăm ki vâ rôe vâ tơniăn ‘na tơdroăng tê dêi kế tơmeăm ki pêi lo

Tơdrêng ƀă troăng rơhlâ pêi pêt, kơvâ ngăn ‘na pêi chiâk deăng kong pơlê Lâm Đồng xuân mơdêk tí tăng ‘nâi mâu tơdroăng, tối hdrối tơdroăng mơnhông pêi pêt, yă tê rôe... vâ kum kuăn pơlê ‘nâi hbrâ pêt kơchâi, plâi, pôm. Malối, hnê tối ƀă thế pro tơ’lêi hlâu veăng kum kuăn pơlê tơkŭm dêi rơpó pêi cheăng tơrŭm ƀă khu mơdró, khu pêi cheăng tơrŭm vâ ai tíu tê tơniăn.

Quang Sáng chêh

Gương tơplôu ƀă tơbleăng