VOV4.Sêdang - Klêi kơ’nâi 13 hơnăm pêi pro Pơkâ kơxô̆ 26-NQ/TW ƀă Pơkâ kơxô̆ 899 dêi Ngế pro xiâm hnê ngăn Chin phuh kĭ ăm pêi pro Tơdroăng tơkêa bro vêh pơ’lêh tung kơvâ pêi chiâk deăng; kơvâ pêi chiâk deăng Lâm Đồng hiăng ai pơ’lêh nhên, châ kơlo tơtêk hên tiô tơdâng tơdjuôm lâp tơnêi têa. Lâp kong pơlê hiăng pơ’lêh dâng 125 rơpâu ha loăng plâi tŭm túa; hên túa pêi pơ’lêh pêt hên hdrê loăng plâi, pêt tơvât tơƀrê hôm tung tơdroăng cheăng kâ.

Troh nôkố, ai lối 60% ƀăng kơphế châ xúa mâu hdrê pơklêp, lơ hdrê mơjiâng ing hdrê ki dâi lĕm; ai dâng 70% ƀăng loăng plâi kâ dâi lĕm. Kơchâi drêh, reăng rế hiá rế hên tŭm túa kơchâi ki dâi lĕm, tơxâng tiô kal vâ dêi kơchơ mơdró; mơjiâng mâu kơpong pêt tơkŭm ‘na loăng plâi ton hơnăm, loăng plâi kâ, kơchâi drêh, reăng pêt, tơxâng tiô tơdroăng kal vâ tơmeăm ăm kơmăi kơmok uâ mơdiê ƀă tê tung kơchơ.

A Sa Ly tơplôu ƀă tơbleăng