VOV4.Sêdang -  Vâ thăm mơnhông pêi chiâk deăng hưh cơ, pa kĭng mâu troăng tŏng kum ‘na hdrê, kih thuât, mơjiâng troăng pêi ki mơnúa apoăng, Lâm Đồng ối tŏng kum mâu tíu cheăng pêi kâ, uâ mơdiê tơmeăm pêi lo ing chiâk deăng hưh cơ ‘na kơxô̆ liăn ‘na mơhnhôk tê mơdró. Pơtối mê, Liăn ngân tơnêi têa tŏng kum 50% kơxô̆ liăn pêi pro tơdroăng mơjiâng inâi, inâi krê tơmeăm dêi túa pêi chiâk deăng hưh cơ ƀă kơlo tŏng kum ki hên ôh tá hluâ 25 rơtuh liăn/1 tíu cheăng.

Pakĭng mê, xuân tŏng kum 50% kơxô̆ liăn vâ mâu khu tê mơdró, ngế krê veăng a kơchơ mơđah tơbleăng kế tơmeăm khoăng tung tơnêi têa, tá kơxô̆ liăn pơto tơmeăm khoăng, mung kơbong ‘măn mơđah tơbleăng kế tơmeăm ƀă kơlo tŏng kum ki hên ôh tá hluâ 25 rơtuh liăn ăm roh veăng tung 1 hơnăm.

Ƀă tơdroăng tŏng kum kố kô kum mâu tíu cheăng thăm veăng mơjiâng inâi krê tơmeăm khoăng, mơđah tơbleăng tơmeăm, ing mê, pro tơ’lêi hlâu vâ châ tê tung kơchơ mơdró, mơnhên inâi ƀă mơdêk ki kơnâ tơbriât cheăng, ăm tơmeăm pêi lo ing chiâk deăng hưh cơ Lâm Đồng.

A Sa Ly tơplôu ƀă tơbleăng