VOV4.Sêdang - Mơ’nui hơnăm 2020, yă prế hdrong a kong pơlê Lâm Đồng tê ƀă yă sap ing 110 troh 120 rơpâu liăn tung môi kg, la troh nôkố, yă prế hdrong tê hiăng châ 180 rơpâu liăn tung môi kg. Tơdroăng ăm ‘nâi sap ing mâu khu mơdró kâ ki mơdâ, pro prế a kong pơlê ăm ‘nâi: Mơhé yă prế hdrong to kơnâ nếo cho xua mâu kong têa ki păn hdrong xo prế dế hlo mơnhông.

Ai mâu kong têa ki ‘nâ hiăng rế hía rế lôu péa kơchơ tê ngi kong têa ê, mâu khu mơdró kâ tung kong pơlê xuân dế ai mâu prế hdrong ki vâ tê ngi kong têa ê ƀă tê hên. Tơdroăng ki prế hdrong to kơnâ, kum kuăn pơlê hmiân tuăn ‘no liăn pêt, po rơdâ túa pêt loăng yâu păn hdrong xo prế, mơdêk cheăng kâ rơpŏng hngêi.

A kong pơlê Lâm Đồng nôkố ai dâng 15 rơpâu rơpŏng kuăn pơlê pêt loăng yâu păn hdrong xo prế, pêt châ lối 8.700 ha loăng yâu, châ 70% ƀăng tơnêi pêt yâu tung lâp tơnêi; ƀă 57 khu pêi cheăng tơrŭm, tôh pêi cheăng tơrŭm ƀă 5 to pơlê cheăng pêt yâu păn hdrong xo prế.

Katarina Nga tơplôu ƀă tơbleăng