VOV4.Xơ Đăng - Kơmăng lơ 17/12, a Tíu xiâm mơ’no Rơ’jíu Việt Nam (58 Quán Sứ, Hà Nội), Rơ’jíu Việt Nam VOV tơkŭm po Kơmăng mơđah tơbleăng mâu ƀai ki má môi châ mot tung roh tơ’noăng má mơ’nui Roh tơ’noăng chêh pro tơdroăng hơdruê ‘’Hơdruê Việt Nam – Let’s sing Việt Nam’’. Kố cho roh mơhnhôk chêh bro rơdâ má môi, tŭm tâi tâng má môi ăm mâu ngế ki rơkê chêh tơdroăng hơdruê ƀă mơngế ki ôh tá hmâ chêh hên tơdroăng hơdruê tung tơnêi têa, mơngế Việt Nam a kong têa ê, mâu ngế ki chêh tơdroăng hơdruê a kong têa ê tối ‘na tơdroăng nhuô̆m pâ Việt Nam.

Tung kơmăng mơđah tơbleăng, 12 tơdroăng hơdruê châ mơđah tơbleăng cho mâu ƀai ki má môi, châ rah xo ing 45 tơdroăng hơdruê mot tung roh tơ’noăng má mơ’nui, rơkê má môi, pro ăm mâu ngế troh ngăn, mâu ngế ki tơmâng ƀă Khu ki châm điêm hâk vâ. A 20h kơmăng kố, lơ 18/12, leh diâp pri Roh tơ’noăng ‘’Hơdruê Việt Nam – Let’s sing Việt Nam’’ kô tơkŭm po a Hngêi hơdruê Rơ’jíu Việt Nam (58 Quán Sứ, Hà Nội).

Tơdroăng kố châ um tơvi mơ’no tơdrêng tung mâu ƀâng VOVTV, VTC1; mơ’no rơ’jíu tơdrêng tung ƀâng VOV1, VOV3; mơ’no tơdrêng tung um VOV.VN, VTC Now, VTC News ƀă mâu ƀâng ki ê dêi Rơ’jíu Việt Nam.

A Sa Ly tơplôu ƀă tơbleăng