VOV4.Sêdang - Kơxo lơ 3/6 a Hà Nội, Khu xiâm ngăn ‘na chiâk deăng ƀă mơnhông thôn pơlê tơkŭm po hneăng hôp mơ’no tơdrêng tung um tơvi lâp tơnêi têa ‘na tơdroăng tăng troh kơdroh tá ki xơpá, tơvâ tơvân kih thuât mơdêk tê tơmeăm pêi lo ing chiâk deăng tung pơla dế ai pơreăng COVID-19. Hneăng hôp kô po tơkŭm tơpui ‘na mâu troăng hơlâ, mê cho: mơjiâng tuá pêi cheăng ki tro ‘na tê tơmeăm pêi lo ing chiâk deăng a kơpong tâ pơreăng; tăng troăng kơdroh tah ki xơpá tơvâ tơvân ‘na chơ tơmeăm ing kơpong tâ pơreăng prôk troh a mâu kong pơlê ki vâ tê tung tơnêi têa ƀă tê ăm kong têa ê.

Tăng troăng kơdroh tah xơpá ‘na tơbleăng plâi treăng kêt dro dêi 2 kong pơlê Bắc Giang ƀă Hải Dương, Khu xiâm ngăn ‘na chiâk deăng ƀă mơnhông thôn pơlê hiăng tơkŭm ăm mâu khu kăn lăm cheăng ƀă mâu kong pơlê a tíu tê mơdró kăng kong ƀă mâu kơ koan ngăn tê mơdró dêi Sinuâ.

Pakĭng mê, séa ngăn nhên khât tơdroăng pêi pêt ƀă xiâm ki ăm mung mâu tơmeăm khoăng ‘na pêi lo ing chiâk deăng a mâu kong pơlê hlối hôp tơpui tơdroăng tăng tíu tê tơmeăm pêi lo ing chiâk deăng ƀă mâu khu mơdró tung tơdroăng xĭng xoăng tơmeăm tê tung tơnêi têa ƀă kong têa ê.

Gương tơplôu ƀă tơbleăng