1.Việt Nam tơkŭm po klêi hneăng tơ’noăng ivá Đông Nam Á rôh má 31 (SEA Games 31) 

Ƀă tơdroăng “Xua môi Đông Nam Á rơdêi tâ’’, Việt Nam hiăng tơkŭm po klêi hneăng tơ’noăng Ivá Đông Nam Á rôh má 31 (SEA Games 31) sap hâi lơ 12-23/5/2022. Luâ 14 hâi tơ’noăng a Hà Nôị ƀă 11 to kong pơlê, pơlê kong kân achê, khu tơ’noăng ivá dêi Việt Nam châ kâ 205 to Mê dai mêa, 125 to Mê dai hâu ƀă 116 Mê dai hlái. Tiô riân, 17 môn ai tung tơdroăng tơ’noăng Olympic hiăng veăng ‘no hnoăng  ăm khu tơ’noăng ivá Việt Nam 119 Mê dai mêa a SEA Games 31, châ 58% hnoăng mêa dêi tâi tâng khu.

Malối, khu kơtú ƀa long vâi kơnốu U23 ƀă khu vâi kơdrâi Việt Nam hiăng kring vế tơniăn Mê dai mêa châ kâ ing hneăng tơ’noăng a hơnăm 2019. A SEA Games 31, tơdroăng sôk ro, têa mâ la tâi tâng tá tơdroăng mơ-eăm dêi tơ’noăng ivá, ing tơdroăng môi tuăn dêi rêm ngế tung khu ASEAN. Môi Việt Nam hmâ, pâ hlế kơ tơmối ƀă tơdroăng veăng tríu hâk têa kŏng dêi mơngế ki ngăn a tâi tâng mâu môn tơ’noăng mơhé ai mâu ngế tơ’noăng ivá dêi tơnêi têa lơ ôh. Tơdroăng ki ‘nâi tơmâng khât tung tơkŭm po hiăng ăm hlo môi Việt Nam tơkâ luâ pơreăng kân, dế vâ  mơnhông ƀă mơdêk.

Tơdrêng amê, Việt Nam xuân hiăng ai hên hnoăng tung tơdroăng tơ'mot tơmối troh ôm hyô ƀă tơbleăng um méa, túa lĕm tro, tơnêi têa, kuăn mơngế Việt Nam troh vâi pú tung kơpong ƀă lâp plâi tơnêi.

2.Khu kơtú ƀa long kơdrâi Việt Nam hiăng rơkê châ veăng roh chung kêt World Cup kơdrâi 2023 roh apoăng sap ing nah troh nôkố.

Khu kơtú ƀalong vâi kơdrâi Việt Nam hiăng rơkê châ veăng roh chung kêt World Cup kơdrâi roh apoăng sap ing nah troh nôkố klêi kơ’nâi châ kâ 2-1 kâ kong têa Đài Loan, Sinuâ a roh kơtú vâ châ mot roh má mơ’nui. Châ kâ dêi Khu kơtú ƀa long kơdrâi Việt Nam rế tơtrŏng tâ drêng mâu ngế kơtú hiăng tơdjâk hên xua pơreăng kân COVID-19.

32 đô̆i mot tung roh chung kêt World Cup 2023 (ai 29 đô̆i châ mot tơdrăng ƀă 3 đô̆i ing roh play-off đi đo) châ klâ 4 khu ngế, rêm khu 8 đô̆i. Klêi kơ’nâi ƀóc xo ngăn tiô mơhúa lơ ôh hiăng djâ khu kơtú ƀa long vâi kơdrâi Việt Nam mot tung ƀảng E ƀă Khu kơtú ƀa long kơdrâi Mih (khu ki kơtú rơkê châ kâ ối má môi) ƀă Khu kơtú ƀa long vâi kơdrâi Hà Lan (châ kâ ối má môi Á quân).

Mâu khu ki ê cho khu ki châ kâ tung ƀảng A roh kơtú play-off, mê cho Ƀồ Đào Nha – Siam lơ Cameroon. Thái hnê kơtú ƀalong Mai Đức Chung cho 1 tung 6 kăn teăng mâ dêi châu Á tơxup tơbriât kơtú a plông kơtú kố ƀă kong têa Sinuâ, Nhuk, Hàn Quốc, Philippines ƀă rơtế khu ki tơkŭm po Australia. Thái hnê kơtú ƀalong Mai Đức Chung xuân tơkâ hluâ hơnăm 2022 châ tơƀrê ƀă châ kâ Mê dai mêa a SEA Games 31.

Kố cho roh má pái pơtối, mâu vâi droh mêa dêi khu kơtú ƀa long Việt Nam châ inâi kân má môi a tíu tơ’noăng kơtú ƀa long SEA Games. Châ tơƀrê kố kum khu kơtú ƀa long vâi kơdrâi Việt Nam châ ối má môi a SEA Games ƀă tâi tâng 7 Mê dái mêa, lôi hơngế khu ối má péa cho Siam (5 Mê dái mêa).

3.Kố cho rôh khu tơ’noăng  Việt Nam pơkâ châ kâ a AFF Cup 2022 vâ tơklâ  ngế ki hnê Park Hang Seo

A rôh tơ’noăng AFF Cup 2022, Khu tơ’noăng Việt Nam dế a bảng B tơdrêng ƀă mâu khu tơ’noăng Malaysia, Singapore, Myanmar ƀă Lếo. Rôh vêh tơ’noăng ƀảng AFF Cup 2022 po tiô pơkâ val vêh 5 đô̆i, tung mê rêm đô̆i kô kơtú 2 rôh a plông tơná ƀă 2 plông a vâi, vâ rah xo 2 đô̆i ki má môi vâ ăm tơ’noăng bán kết. Khu tơ’noăng ivá Việt Nam kô kơtú 2 rôh a plông tơmối trâm Lếo ƀă Singapore tung 2 rôh tơ’noăng a plông tơná trâm Malaysia bă Myanmar. Kố cho rôh tơ’noăng dêi khu kơtú ƀa long Việt Nam châ pơkâ kân trâng vâ tơklâ Ngế ki hnê cho Park Hang Seo.

5 hơnăm xua ing Park Hang Seo Ngế ki hnê djâ, khu tơ’noăng ivá Việt Nam hiăng pơtối rak vế ki rơdêi ối má môi tung kơpong Đông Nam Á. Pakĭng mê, xuân cho tơnêi têa Đông Nam Á ki châ ối ton má môi tung top 100 dêi FIFA, Ngế ki hnê Park Hang Seo hiăng rơtế ƀă khu kơtú ƀa long Việt Nam châ hên hnoăng ki pơxúa tung rơxông ƀă châ khĕn kơdeăn a tơdroăng kơtú ƀa long châu Á 5 hơnăm hdrối, mê cho: U23 Việt Nam châ pơxá Á quân a VCK U23 châu Á  hơnăm 2018, ối má Pŭn a rôh tơ’noăng ASIAD hơnăm 2018, 2 hdrôh pơtối châ kâ Mê dai Mêa ’na kơtú ƀa long vâi kơnốu a SEA Games 30  ƀă  31;  khu kơtú ƀa long Việt Nam châ ối má môi  AFF Cup 2018, châ mot tung tứ kết ASIAN cup 2019 ƀă malối cho veăng ai mâ a rôh tơ’noăng má mơ ‘nui FIFA World Cup 2022 - kơpong châu Á .

4.U23 Việt Nam hiăng châ Mê dái mêa SEA Games 31 ƀă mot tung tứ kêt tơ’noăng U23 châu Á 2022

A SEA Games 31, U23 Việt Nam hiăng kâ Mê dái mêa a môn kơtú ƀa long khu kơnốu. Kố cho roh má péa pơtối, Khu kơtú ƀa long dêi thái hnê kơtú ƀalong Park Hang Seo châ kâ kân má môi a roh tơ’noăng kố. Vâ gâk kring châ tơƀrê Mê dái mêa a môn kơtú ƀa long kơnốu, U23 Việt Nam hiăng châ kâ Indonesia 3-0, tơ’mô Philippines 0-0, châ kâ Myanmar 1-0, hluâ Timor Leste 2-0 a vòng ƀảng. Kơ’nâi mê, khu kơtú ƀa long dêi thái hnê kơtú ƀa long Park Hang Seo châ kâ Malaysia ƀă Siam rơtế châ kâ 1-0 a ƀán kết ƀă chung kết. Kố cho hneăng SEA Games má mơ’nui, thái hnê kơtú ƀalong Park Hang Seo djâ U23 Việt Nam tơ’noăng.

A roh chung kết tơ’noăng U23 châu Á 2022 tơkŭm po a Uzbekistan sap hâi lơ 1 – 19/6/2022, U23 Việt Nam ối rơtế ƀảng tơ’noăng ƀă Hàn Quốc, Siam ƀă Malaysia. Ing hnê djâ dêi Thái hnê kơtú ƀa long ngế Hàn Quốc Gong – Oh-Kyun, U23 Việt Nam hiăng rơkê châ hluâ vòng ƀảng, ahdrối pơtê ƀă thu 0-2 khu kơtú ƀa long Saudi Arabia. Saudi Arabia xuân cho khu hiăng châ kâ ối má môi hneăng tơ’noăng kố châ kâ khu ki tơkŭm po kơtú ƀa long U23 Uzbekistan châ kâ 2-0 tung roh chung kết.

5.Vũ Phương Thanh ngế ki châ ối má môi lâp plâi tơnêi pái môn tơrŭm ƀă hlối má môi lâp plâi tơnêi

Hâi lơ 29/8, troăng ki xiâm dêi SwissUltra 2022 chêh rơkong rơkâu ngế ki ƀlêi trâng dêi Việt Nam ƀă nâl Ănglê: “ Kố cho tơdroăng mơhno dêi Ngế ki rơkê má môi lâp plâi tơnêi:  Rơkâu Thanh Vũ ‘’ . SwissUltra cho pri ki pái môn tơrŭm ƀă ki pá má môi tung plâi tơnêi. Mâu ngế ki tơ’noăng veăng tơ’noăng mê thế tơ’noăng klêi 38km klê têa, 1.800 km kơto rơxế ƀă kơtâu 422km. Tâi tâng cự ly ki tơ’noăng dêi plông tơ’noăng mê xŏn luâ 10 hdroh môi rôh tơ’noăng full triathlon.

Kơ’nâi 14 hâi tơ’noăng, Vũ Phương Thanh hiăng klêi tơdroăng tơ’noăng dêi nâ a SwissUltra 2022 ƀă tâi tâng hnoăng gá tơ’noăng 328 chôu27phut 55 yâi vâ châ to mối má môi dêi vâi kơdrâi. Vũ Phương Thanh ( kot mâ hơnăm 1990), châ pơxá cho “Ngế kơdrâi kơtâu rơtâ tá lâp plâi tơnêi’’ lơ ‘’ Reăng rôsa a ‘núa prêi’’.

Hơnăm 2016, ga cho ngế châu Á ki apoăng kơtâu tơkâ luâ ‘núa prêi  ki pá má môi lâp plâi tơnêi ƀă tâi tâng troăng ki gá kơtâu 1.000km, mê cho ‘núa prêi Atacama  dêi (Chile), ‘núa prêi Gobi dêi (Sinuâ), ‘núa prêi Sahara dêi (Egipto) ƀă ‘núa prêi Antarctica dêi  (Nam Cực).

6.Hneăng tơ’noăng ivá lâp tơnêi têa hơnăm 2022 châ tơƀrê lĕm

Hneăng tơ’noăng ivá lâp tơnêi têa hơnăm 2022 tơkŭm po sap hâi lơ 9 – 21/12 a Quảng Ninh rơtế 10 kong pơlê, pơlê kong kơdrâm ki achê. Hneăng tơ’noăng tơkŭm 17.000 ngế veăng, tung mê, ai 10.000 ngế veăng teăng mâ ăm 63 kong pơlê, pơlê kong kơdrâm ƀă khu mô đô̆i, tơ’noăng a 43 môn tơ’noăng 942 tơdroăng, ƀă cho hneăng tơ’noăng kân má môi sap ing nah troh nôkố.

Mâu ngế tơ’noăng tơbriât 933 khu Mê dái. Mơgêi hneăng tơ’noăng, khu Hà Nội châ ối má môi tâi tâng khu ƀă 475 Mê dái, tung mê 175 Mê dái mêa; khu tơ’noăng Pơlê kong kân Hồ Chí Minh ối má péa ƀă 128 Mê dái mêa; ối má pái cho khu mô đô̆i ƀă 90 Mê dái mêa. A hneăng tơ’noăng hiăng ai tâi tâng 53 ôí má môi tơnêi têa ƀă 96 ối má môi hneăng tơ’noăng châ pro.

Klêi kơ’nâi châ tơƀrê dêi SEA Games 31, Hneăng tơ’noăng lâp tơnêi têa cho roh vâ mơnhên tâi tâng tơdroăng tơ’noăng ivá tung lâp tơnêi têa. Hneăng tơ’noăng xuân cho roh tơ’lêi ti tăng mâu ngế rơkê nếo ăm tơ’noăng ivá Việt Nam hbrâ ăm mâu pro tơ’noăng lâp plâi tơnêi tung la ngiâ, a ngiâ cho hneăng SEA Games 32 châ tơkŭm po a kong têa Kul a khế 5/2023.

7-Rôh tơ’noăng  mơgêi kơtú ƀa long lâp plâi tơnêi hơnăm 2022 World Cup 2022 châ tơkŭm po a mâu kong têa tiô khôp Islam Trung Đông ƀă Lionel Messi rơtế ƀă Argentina châ ối má môi

Rôh tơ’noăng mơgêi kơtú ƀa long lâp plâi tơnêi hơnăm 2022 (World Cup 2022) châ tơkŭm po a Qatar sap hâi lơ 20/11 troh lơ 18/12/2022 ƀă hên tíu ki ro tơviah: rôh apoăng World Cup châ tơkŭm po a môi kong têa tiô khôp Islam Trung Đông tung rơxông, rôh tơ’noăng mơgêi kơtú ƀa long lâp plâi tơnêi po a rơnó hngíu teăng rơnó tô; rôh apoăng Morocco - môi khu kơtú ƀa long châu Phi châ mot tung khu kơtú bán kết. Rôh tơ’noăng mơgêi tung tơdroăng sôk ro má môi tung rơxông dêi World Cup pơla Pơhlăng ƀă Argentina cho vâ mơhno ki rơkê. Klêi hên hơnăm tơkôm, mơ’nui ngế ki rơngế kơtu ƀa long Lionel Messi hiăng ai inâi World Cup klêi kơ’nâi rơtế ƀă Argentina châ ối má môi World Cup  2022.

Tơná Messi hiăng ai hơnăm 2022 tơ’noăng châ ƀlêi má môi ăm tơdroăng cheăng a râ khu kơtú ƀa long dêi tơnêi têa ƀă ai 18 rôh châ kâ. Riân krê to World Cup 2022, Messi hiăng châ kâ 7 rôh. Messi hiăng ai tiah mê a tâi tâng mâu i nâi ki kân kŭn ki môi ngế kơtú ƀa long châ kâ tung tơdroăng tơ’noăng ivá dêi tơná.

8.Olympic rơnó Hngíu hơnăm 2022 châ tơkŭm po tiô troăng ‘’tơ’lêi hlâu’’

Olympic rơnó Hngíu cho tơdroăng ki kal râ lâp plâi tơnêi apoăng tơkŭm po tung hơnăm 2022. Sinuâ cho tơnêi têa tơkŭm po hneăng tơ’noăng hơnăm kố. Tơdroăng kal pơxiâm po a hâi lơ 4/2/2022 a plông tơ’noăng Tổ Chim, pơlê kong kân Bắc Kinh. Kố cho hneăng Olympic rơnó hngíu apoăng châ tơkŭm po a kong têa Sinuâ. Ki rơhêng vâ tối, Bắc Kinh chiâng pơlê kong kơdrâm apoăng sap ing nah troh nôkố tơkŭm po tá Olympic rơnó hngíu hlối Olympic rơnó tô.

Veăng amê ai 95 kong têa ƀă kơpong, Olympic rơnó hngíu 2022 châ kong têa ki tơkŭm po tiô troăng “tơ’lêi hlâu” môi tiah Olympic Tokyo 2020 vâ tơniăn ăm mâu ngế tơ’noăng ƀă hneăng tơ’noăng châ tơkŭm po tơ’lêi hlâu. A hneăng tơ’noăng Olympic kố, khu tơ’noăng ivá Na Uy ối má 1 ƀă 16 Mê dái mêa. Ối má péa cho khu tơ’noăng kong têa Alơmăng ƀă 12 Mê dái mêa. Kơdrâ kân má môi dêi Olympic rơnó hngíu kố cho khu tơ’noăng ivá kong têa Sinuâ hiăng hluâ Mih vâ ối má 3 ƀă 9 Mê dái mêa, 4 Mê dái hâu ƀă 2 medái hlái.

9.Hneăng hôp tơ’noăng ivá châu Á (ASIAD) rôh má 19 tro pơtê xua pơreăng COVID-19

Hneăng tơ’noăng ivá châu Á (ASIAD) rôh má 19 cho môi tung mâu tơdroăng ki tơ’noăng ivá kân má môi dêi châu Á. Tơdroăng kố tiô tối hdrối po a pơlê kong kân Hàng Châu, Sinuâ sap ing hâi lơ 10 – 25/9 hơnăm kố. Laga, hâi lơ 6/5, Hô̆i đong Olympic châu Á (OCA) hiăng pơkâ pơtê ASIAD 2022 xua pơreăng COVID-19 tâ tú rơ-iô a Sinuâ ƀă hneăng tơ’noăng kân kố tiô tối hdrối kô châ vêh po nếo xuân a Hàng Châu, Sinuâ a hơnăm kơ’nâi. Hâi khế po sap ing hâi lơ 23/9 – 8/10/2023.

ASIAD hơnăm 2023 cho hneăng tơ’noăng ivá châu Á rôh má 19 sap nah troh nôkố. Kố cho tơdroăng ki mơni kô ối má péa tung lâp plâi tơnêi, bu kơ’nâi tâ Olympic rơnó tô. Kố cho rôh má pái, Sinuâ tơkŭm po ASIAD, klêi kơ’nâi hiăng cho ngế ki pơkuâ dêi tơdroăng kố a mâu hơnăm 1990 ƀă 2010.

10. Roger Federer hiăng tơbleăng pơtê cheăng, Rafael Nadal châ kâ pri Grand Slam rôh 22

Tơmiât trâm hên xơpá xua ivá hơnăm hiăng hên, Rafael Nadal xuân ối mơhno tối tơdroăng ki rơdêi tung hơnăm 2022 ƀă péa to inâi Grand Slam a Australia ƀă Pơhlăng. Tơdroăng kố kum ngoh châ 22 inâi Grand Slam tung tơdroăng cheăng. Kố cho kơxô̆ ki hên dêi ngế tơ’noăng peăng xâk í lâp plâi tơnêi. Tung mê, tơdế khế 9 hơnăm kố, ngế ki tơ’noăng peăng xâk í ki rơkê châ vâi ô eăng Roger Federer hiăng tơbleăng pơtê cheăng tung pơla ngoh châ dế châ 41 hơnăm. Ngế ki tơ’noăng peăng xâk í kố hiăng tơ’noăng lối 1.500 rôh tung 24 hơnăm. Roger Federer mơgêi lối péa chât hơnăm tơ’noăng ƀă 103 inâi, 310 măng tĭng a tíu má kơxô̆ 1 lâp plâi tơnêi, tung mê ai ki hên cho 237 măng tĭng ki pơtối hlối.

Ngế ki tơ’noăng kot mâ hơnăm 1981 cho ngế ki apoăng châ 20  Grand Slam. Ngoh châ a 8 to pri Wimbledon, 6 pri Australia Open, rak 5 rôh má môi pơtối hlối châ kâ pri Mih po rơdâ ƀă châ kâ pri Roland Garros hơnăm 2009. Federer xuân châ kâ 6 inâi ATP World Tour Finals, Mê dái hâu môi ngế kơnốu Olympic 2012 ƀă Mê dái mêa péa ngế kơnốu Olympic 2008.

Rôh tơ’noăng ki má mơ’nui ki Roger Federer tơ’noăng cho rôh tơ’noăng peăng xâk í rơtế ƀă Rafael Nadal a rôh tơ’noăng ƀă pré péa ngế Jack Sock/Frances Tiafoe a rôh tơ’noăng Laver Cup 2022 po a mơ’nui khế 9 hơnăm kố.