VOV4.Xơ Đăng - Ƀă dó inâi ‘’Ƀeăn ƀĕng tơdroăng pơ’lêh – kâi trâng xông tơtêk’’, Tơ’noăng chêh ƀai mơ’no tiô troăng Rơ’jíu lâp tơnêi têa roh má XV hơnăm 2022 xua Rơ’jíu Việt Nam (VOV) tơrŭm ƀă Vi ƀan pơlê kong kân Hồ Chí Minh tơkŭm po hiăng pơxiâm po kơmăng hnah lơ 4/8 a Hngêi hơdruê pơlê kong kân Hồ Chí Minh. Tơ’noăng hơnăm kố ai veăng dêi 86 kơ koan, 203 ƀai chêh mot tung roh mơgêi, ai 65 ƀai chêh ối tung khu ƀai hơ’muăn tơdroăng ki nếo ai tung pơlê pơla; 37 khu ƀai chêh ‘na kơ-êng; 11 tơdroăng hơ’muăn pro pơro; 57 tơdroăng ƀai chêh mơ’no tung rơ’jíu; 33 tơdroăng pro pơro; 34 tơdroăng ƀai chêh mơ’no tơdrêng.

 Mơgêi tơ’noăng ƀai chêh mơ’no tiô troăng Rơ’jíu lâp tơnêi têa roh má XV

Tơ’noăng chêh ƀai mơ’no tiô troăng Rơ’jíu roh kố cho môi tơdroăng ki kơnâ ƀă pơlê kong kân Hồ Chí Minh ƀă lâp tơnêi têa klêi kơ’nâi lối 2 hơnăm hbrâ, mơdât pơreăng COVID-19. Mâu ƀai chêh tối tơdroăng ki ai khât ƀă rơdêi khât tung tơdroăng hbrâ, mơdât pơreăng ƀă rak tơniăn mơnhông mơdêk cheăng kâ – rêh ối pơlê pơla kô châ pơ-ôu pơ-eăng ƀă diâp pri a roh Tơ’noăng roh kố.

A Sa Ly tơplôu ƀă tơbleăng