Hâi lơ 7/4, Khu pơkuâ hnê hriâm ƀă Hnê mơjiâng tuăn ngôa rơkê kong pơlê Điện Biên hiăng tơkŭm po mơđah tơbleăng kơhnhon chal nếo, kơhnhon xuăng troăng kơphô̆ dêi hok tro, sinh viên. Kố cho tơdroăng ki kal khât koh phiu roh leh tơbâ 70 hơnăm ƀlêi trâng Điện Biên Phủ. Tơdroăng mơđah tơbleăng tơdrêng amê tung 4 tíu: plông kân 7/5, plông kân pơlê kong kơdrâm Điện Biên Phủ, plông tơkŭm po leh ƀă plông tíu meăn um ƀlêi trâng Điện Biên Phủ.

Khu pơkuâ hnê hriâm ƀă Hnê mơjiâng tuăn ngôa rơkê kong pơlê Điện Biên hiăng mơhnhôk 11 tíu cheăng, ƀă lối 2.200 ngế hok tro, sinh viên veăng mơđah tơbleăng lối 33 tơdroăng kơhnhon, ƀă mâu tơdrá xòe, xuăng tiô chal nếo mơhno khôi túa lĕm tro mâu hdroâng kuăn ngo môi tiah: Thái, Mông, Lếo ƀă hía hé rơtế mâu tơdroăng kơhnhon ki má lĕm ro má môi.

Mâu tơdroăng mơđah tơbleăng châ pêi pro tiô troăng tơdrêng, teăng dêi pó. Tơdroăng vâ rak vế ƀă mơnhông kơhnhon xuăng chal nếo ƀă mâu tơdrá troăng kơphô̆ tung hok tro, sinh viên; rak khôi túa lĕm tro kuăn pơlê hdroâng kuăn ngo kong pơlê Điện Biên. Ki rơhêng vâ tối cho troh lâp lu um méa Điện Biên troh ƀă pú hmâ achê hơhngế, mơdêk mơnhông ôm hyô kong pơlê.