VOV4.Xơ Đăng - Troh hâi lơ 27/1, prôa têa a kơno to plong long Xuân Hương hiăng pêi klêi tơdroăng pro má mơ’nui teăng vâ xúa po ăm mâu tơmối troh ôm hyô ƀă kuăn pơlê a kong pơlê kố vâ tơmâng tung rôh Têt Lo hơnăm nếo Nhâm Dần 2022. Prôa têa mê ai tâi tâng kơxô̆ liăn ‘no mơjiâng pro apoăng vâ chê 10 rơtal liăn, xua kŏng ti veăng tơlo liăn Lan Anh - Đà Lạt diap ăm mơjiâng pro.

Tơmeăm pro cho tíu ki vâ mơhno tơ-ƀrê dêi Đà Lạt a kơmăng, vâ po mơ’no ăm kuăn pơlê ƀă tơmối ôm hyô

Prôa mê châ pro krâ ‘măn a kơpong Kơno têa hmâ to plong a long Xuân Hương, túa mơjiâng pro tio tơdrá têa plong chhá đông a têa, tŭm tơdroăng cheăng xuân châ po mơ’no ƀă phần mềm ki hmâ xúa. Prôa têa mê mơhé pro a têa ôh tá rơdâ la hiăng pro gá a môi víu dêi long Xuân Hương, tơkŭm ƀă nhâ loăng kong kế, mâu mâu kŏng viên  ôm hyô ngăn reăng, ai idrâp, on trâ eăng... pro môi tíu ôm hyô ki lĕm ro nếo ăm kơvâ ôm hyô dêi kong pơlê.

Ôh tá xê to vâ hyô ngăn tung rôh Têt mê prôa têa kố kô pơtối ‘măn po mơ’no đi đo a kơmăng mâu hâi pơtăm, hâi tơdrốu, hâi tĭng rêm măng tĭng, mơ’no ki ton iâ gá tâi  hâi lơ 31/12/2024.

Gương tơplôu ƀă tơbleăng