VOV4.Xơ Đăng - Kơxo lơ 8/4, a hngêi tơ’noăng ivá kong pơlê Dak Lak, pơlê kong kơdrâm Ƀuôn Ma Thuột, Khu pơkuâ ‘na mơhno túa lĕm tro, tơ’noăng ivá ƀă Ôm hyô kong pơlê tơrŭm ƀă Khu pơkuâ hdroâng kuăn ngo kong pơlê tơkŭm po ‘’Pơxiâm po Hneăng hôp tơ’noăng ivá mâu hdroâng kuăn ngo Dak Lak roh má XVIII hơnăm 2022’’. Hneăng tơ’noăng kô tơkŭm po sap hâi lơ 8/4 troh hâi lơ 10/4/2022.

Teăng mâ kăn pơkuâ Vi ƀan kong pơlê Dak Lak diâp hlá kơ tơbâ ăm khu tơ’noăng

Lối 600 ngế tơ’noăng lo ing 15 khu dêi mâu tơring, pơlê krâm ƀă pơlê kong kơdrâm Ƀuôn Ma Thuột, veăng tơ’noăng 7 môn mê cho: Peăng ƀalong (kơnốu, kơdrâi) kơtú ƀalong mini kơnốu, kơtâu (kơnốu, kơdrâi), to chêng klĕng (kơnốu, kơdrâi), pĕng mơnĕng (kơnốu, kơdrâi), trŭt loăng (kơnốu, kơdrâi) ƀă tơhrŏt kơxái.

Kố cho mâu môn tơ’noăng ivá tiô khôi vâi krâ nah hmâ châ tơkŭm po tung mâu roh leh, roh xah hêi a pơlê. Hneăng tơ’noăng ivá mâu hdroâng kuăn ngo kong pơlê cho hneăng tơ’noăng ivá tiô khôi vâi krâ nah châ tơkŭm po rêm hơnăm, laga xua pơreăng COVID-19 xông tâ tú ó, hneăng tơ’noăng hơnăm 2021 tro pơtê troh hơnăm kố.

Mâu ngế tơ’noăng veăng tơ’noăng a môn kơtâu khu kơdrâi

Mâu ngế tơ’noăng cho kuăn pơlê mâu hdroâng kuăn ngo dế rêh ối ƀă pêi cheăng a Dak Lak. Ing hneăng tơ’noăng, rơtế mơnhông mơdêk rơdâ tơdroăng pơtâp ivá tơ’noăng ivá, mơdêk ivá, hiêm mơno ăm kuăn pơlê, ti tăng, rak vế ƀă mơnhông mơdêk ki kơnâ khôi túa lĕm tro, thăm pro krá tơniăn tơdroăng rŭm môi tuăn tung pơlê pơla mâu hdroâng kuăn ngo a kong pơlê.

A Sa Ly tơplôu [ă tơbleăng