VOV4.Xơ Đăng - Tung hneăng ki po hâi xah hêi “Á pâ dêi tơnêi têa xiâm á”, Khu kăn pơkuâ ngăn Đoân Droh rơtăm kong pơlê Dak Lak hiăng tơkŭm po Mơđah hnê djâ tơdroăng hơdruê kăch măng, vâi droh rơtăm rơngê ting ting ƀă tŏn chêng koăng dêi kuăn ngo. Ing mê, ai hên mâu tơdroăng rơngê ting ting, hơdruê, tŏn chêng koăng dêi mâu tơring hiăng châ mơđah ro rih, lĕm tơniăn ó khât, mơhno tối ‘na ki xiâm dêi tơdroăng mơhno túa lĕm tro dêi rêm kơpong tơnêi tíu.

Tơdrá ki tŏn chêng kơlá, dó inâi “Tơdah nhŏng o” chuât xơtó ro rih pro tâi Kơbong ki Mơđah hnê djâ tơdroăng hơdruê xuâng tối ‘na kăch măng, khu vâi droh rơtăm rơngê ting ting ƀă hnôí tŏn chêng koăng dêi hdroâng kuăn ngo thăm rế ro ó tâ nếo. Mâu vâi rơtăm, vâi droh hdroâng Rơđế tung hmân ếo pơtâk dêi kuăn ngo, vâi tŏn chêng kơlá hnối ai tá tơdroăng kơhnhon xuâng, mơhno tối ‘na túa ki tơdah krếo ôu drôu dêi mơngế Rơđế. Kố cho môi tơdroăng ki veăng tơdah mơđah tŏn chêng koăng, rêi prôa dêi hdroâng kuăn ngo, dêi Khu Đoân Droh rơtăm tơring Krông Ƀuk ki veăng lăm mơđah roh kố.

Tơdroăng mơđah tŏn prôa dêi hdroâng kuăn ngo dêi khu Krông Ƀuk

Ngoh Y Thu Mlô, ối a ƀuon Tlan, cheăm Čư̆ Pơng, tơring Krông Ƀuk ai tối tiah kố, klêi kơ’nâi vâ chê 2 hơnăm athế pơtê tơdroăng mơhriâm, pơtâp xua ai tơdjâk ing pơreăng COVID, mê hneăng ki mơđah roh kố cho roh ki vâ tâi tâng khu nhŏng o toh chôu vâ mơhriâm, vêh tơbâ mâu ƀai chêng hiăng châ pơtâp.

“Veăng a hâi ki mơđah kố cho roh ki vâ mâu vâi pú tung thôn pơlê châ trâm, hriâm dêi pó, malối drêng ƀă mâu vâi pú hmâ ing tơring ki ê, vâ châ tâng, châ ‘nâi ‘na tơdroăng tŏn chêng tôu koăng, klêi mê, hơdruê mâu ƀai hơdruê ‘na kăch măng. Ki xiâm dêi tơdroăng mơđah kố cho vâ châ ngăn, châ hriâm dêi pó cho ki kal má môi. Châ hlo klêi kơ’nâi to lâi hơnăm pơtê pơto, ôh tá châ mơđah, ôh tá châ trâm xua pơreăng, mâu tơdroăng ki mơhno túa lĕm tro, hơdruê xuâng nôkố hiăng châ vêh po nếo. Ing mê, kố xuân cho roh ki vâ tơdroăng mơhno túa lem tro tung pơlê châ pơtối mơdêk, mơnhông”.

Khu Ƀuôn Đôn hiăng mơđah mâu prôa, rơvŏng hlŭm dêi kuăn ngo Lếo hnối ai tá xuâng Lăm Vông

Tâi tâng ai 48 tơdroăng hơdruê xuâng, cho mơđah a 3 tơdroăng pơrá phá, mê cho mâu tơdroăng hơdruê ‘na kăch măng, rơngê ting ting ƀă tơdroăng tŏn chêng koăng, rêi prôa kuăn ngo, ai vâ chê 300 ngế cho mâu đoân viên, droh rơtăm, kăn ƀô̆ đoân, khu lo ing 16 khu ing mâu tơring, hngêi trung cao đăng công nghệ Tây Nguyên ƀă Câu lạc bộ Người dẫn chương trình dêi kong pơlê veăng mơđah.

Rêm khu pơrá châ rah xo mâu tơdroăng hơdruê xuâng ki phá krê dêi tơná, kơpong tơnêi tíu, cho ki lĕm tro, ro rih krê xêh dêi pơlê pơla a kơpong ki tơná rêh ối vâ mơđah tơbleăng a hâi mơđah tơdjuôm mê. Rơtế ƀă mâu tơdrá hơdruê, mâu idrâp chuât dêi mâu prôa, chêng koăng dêi mâu hdroâng kuăn ngo, môi tiah tơdrá eirei, chêng kơlá dêi hdroâng kuăn ngo Rơđế, rơngê ting ting dêi M’nông, Bơhnéa mê mâu tơdrá ki lĕm ro dêi mâu hơdruê quan họ Bắc Ninh, hlá khiê̆n, rơvŏng pơlái lơ tơdrá then dêi hdroâng kuăn ngo Tày xuân châ hên khu râ rah xo vâ mơđah.

Mơngiơk hdroâng kuăn ngo peăng Kơnhŏng a roh mơđah

Ki rơhêng vâ tối, khu ki lo ing tơring Ƀuôn Đôn mơđah tơdroăng mơđah tŏn chêng kpoăng, rêi prôa Lếo hnối ai tơdroăng kơhnhon xuâng Lăm Vông, ƀă idrâp chuât ki ro rih, hơniâp ro. Ngoh Y Nô Ly Kƀuôr, hdroâng kuăn ngo Rơđế, ối a cheăm Krông Na, tơring Ƀuôn Đôn, cho ngế ki pơkuâ xiâm mơđah mâu khu prôa dêi mơngế Lếo, cheăm Krông Na ai tối, xua ing hiâm mơno ki hâk git kơ tơdroăng mơhno túa lĕm tro ‘na tơdrá, prôa, hơdruê xuâng dêi mơngế Lếo, mê khu vâi pú hơnăm ối nếo a cheăm Krông Na hiăng tơkŭm chiâng khu rêi prôa dêi mơngế Lếo, tơkŭm mơhriâm ƀă lăm mơđah mâu tơdroăng mê, xua cheăm, tơring tơkŭm po.

Maluâ rêm ngế rêm tơdroăng cheăng, maluâ tơvâ tơvân, mâu ngế tung khu xuân ối mơdoh chôu phut, hâi khế ki pơtâp đi đo.

“Drêng ai hneăng tơ’noăng tiah mê, peăng pá khu ki hriâm mê hiăng pơtâp châ môi pơla măng tĭng a mâu hâi pơtê a mơ’nui măng tĭng lơ a kơmăng mê mâu vâi pú tôh chôu vâ hriâm. Khu ki mơjiâng mê hiăng rak vế troăng hơlâ dêi khu mơhno túa lĕm tro dêi hdroâng Lếo cho vâ veăng kum ăm vâi krâ-nhŏng o kuăn pơlê mơgế Việt Nam xiâm rêi Lếo a cheăm Krông Na, xuân môi tiah cho veăng mâu hneăng tơ’noăng klêi mê, troh mâu hâi mơdĭng xah ôm hêi môi tiah Bunpymay, ối tối cho Têt dêi mơngế Lếo”.

Hên vâi droh rơtăm ki rơkê hơdruê, rơngê ting ting hnối hlŭm rơvŏng, tŏn chêng koăng

Mơgêi hneăng mơđah kố, Khu châm điêm hiăng diâp 3 pri A, 6 pri B ƀă 9 pri C ăm mâu ngế ki rơkê a 3 tơdroăng. Diâp pri má môi ăm tâi tâng khu dêi tơring Čư̆ Mgar. Tiô seá ngăn dêi Khu châm điêm tối, hên khu râ veăng tơ’noăng mê dêi khu kố hiăng mơ’no liăn, hnê mơjiâng mâu tơdroăng hơdruê xuâng, tŭm têk tiô kơ tơdroăng dêi Khu hnê mơhno, hbrâ rơnáu mâu kế tơmeăm, hmân ếo pơtâk ƀă ché ki mơđah cho tơtro tiô khu râ ki tơtro khât.

Ki rơhêng vâ tối, a mâu khu pơkuâ hnê ngăn Đoân Droh rơtăm, mâu vâi o ki ối tro hơnăm ối hdrêng, hok tro xuân hiăng veăng ai mâ, tơ’noăng mơđah akố, maluâ cho mâu tơdroăng ki rêi prôa, tŏn chêng koăng, hlŭm rơvŏng dêi hdroâng kuăn ngo, ing mê, khoh pro chiâng ai hên tơdroăng ki vâ mơhno tối, veăng kum ăm tơdroăng ki ƀlêi chiâng dêi tơdroăng mơđah mê.

Pôa Lê Văn Hồng, Kăn phŏ ngăn ‘na hơdruê xuâng, Hngêi trung Cao đẳng Văn hoá Nghệ thuật kong pơlê Dak Lak, Kăn pơkuâ ngăn khu châm điêm séa mơnhên tối:

“Khu tơkŭm po ƀă Khu châm điêm xuân hiăng hâk phiu ƀă ro rih păng ‘nâng xua hlo mâu vâi pú hơnăm ối nếo cho hdroâng kuăn ngo,. đoân viên droh tơtyăm ki pin châ rak vế khôi túa, vêa vong dêi hdroâng kuăn ngo, tŏn chêng koăng cho tơdroăng ki ai poxúa kân khât. Klêi mê, ai mâu khu prôa, rơvŏng hlŭm dêi hdroâng kuăn ngo, hlŭm hlá, rơvŏng, ki rơhêng vâ tối cho môi khu prôa dêi hdroâng Lếo xuân cho lĕm tro ‘nâng, mơđah hên túa, troăng hơlâ.

Ai mâu khu ki ‘nâi hiăng ai tơdroăng ki mơhriâm, pơtâp nhên ó khât ‘na tơdroăng rơngê, ting ting, ki rơhêng vâ tối ‘na mâu tơdrá dêi Tây Nguyên. Klêi mê, ai mâu tơdroăng ki rơngê ting ting dêi hdroâng kuăn ngo peăng Kơnhŏng, mơhno tối tơdroăng ki rơkê dêi mâu ngế ki hơdruê, hnối mơhno tối ‘na mâu tơdrá dêi mâu hdroâng kuăn ngo”.

Ƀă hên mâu tơdroăng hơdruê xuâng mê, mơohno tối ‘na rêm kơpong tơnêi tíu, mê hneăng tơ’noăng mơđah hơdruê tối ‘na kăch măng mê, khu droh rơtăm rơngê ting ting ƀă mơđah rêi prôa, hlŭm rơvŏng kuăn ngo hiăng mơjiâng chiâng tơdroăng ki tơtro khât ăm khu đoân viên droh rơatăm mâu hdroâng kuăn ngo tung kong pơlê Dak Lak.

Ing mê, mơhno tối tơdroăng ki hâk git ƀă mâu túa hơdruê xuâng, veăng kum rak vế ƀă pơtối mơnhông ‘na mơhno túa lĕm tro mâu hdroâng kuăn ngo.

H’Xíu H’Mok chêh

Nhat Lisa tơplôu ƀă tơbleăng