Kơxo lơ 3/2, a Troăng tơbleăng kơxop hlá mơ-éa Kơphế Ƀuôn Ma Thuột, Khu pơkuâ Văn hok văn nghê̆ thuât kong pơlê Dak Lak tơrŭm ƀă Khu pơkuâ ‘na mơhno túa lĕm tro, Tơ’noăng ivá ƀă Ôm hyô kong pơlê tơkŭm po Hâi thơ Việt Nam roh má 21, hơnăm 2023 ƀă dó inâi ‘’Pơlê kong kơdrâm kơphế tơdjuôm Rơrêk nếo’’. Tung rơrêk chêng Knah ro rih, tơdrá tơdŭt chuât rơdêi ‘’Krếo Xeăng – krếo vêh tơkŭm’’, rơtế ƀă hên tơdroăng mơđah tơbleăng pêng păm mơngiơk mơhno khôi túa lĕm tro Tây Nguyên, mâu kăn teăng mâ ƀă tơmối ôm hyô châ tơmâng mâu tơdroăng ki ro tơniâ ngê̆ thuât, tơdjêp mơđah tơbleăng tôu chêng koăng, rêi kế xah hdroâng kuăn ngo, pơchuât kơthơ, ƀă hên tơdroăng ki châ hlo châ tâ ki ê môi tiah kơchuâ um, pong rơgi loăng, pâ chư chêh chal vâi krâ nah, mơđah tơbleăng kơxop hlá mơ-éa, um,  um ngê̆ thuât.

Rơtế a mê, tơdroăng tơkŭm po ‘na chêh kơthơ ƀă tơdroăng mơđah tơbleăng tôu chêng phiu ro rơnó Hơngui xua mâu nâ o khu tôu chêng Mường a cheăm Hòa Thắng, pơlê kong kơdrâm Ƀuôn Ma Thuột mơđah tơbleăng xuân pro chiâng hên tơdroăng ki lĕm ƀă mơngế ki veăng.