VOV4.Xơ Đăng -  Tung 5 hơnăm la ngiâ, kong pơlê Dak Lak kô ‘măn lối 20 rơtal liăn vâ pơtối pêi pro pơkâ rak vế ƀă mơnhông mơdêk khôi túa lĕm tro chêng koăng a kong pơlê. Kố cho tơdroăng xiâm ối tung Pơkâ pêi pro Pơkâ dêi Hô̆i đông kong pơlê ‘na rak vế ƀă mơnhông mơdêk khôi túa lĕm tro chêng koăng kong pơlê Dak Lak, hneăng hơnăm 2022 – 2025 rế châ Viƀan kong pơlê Dak Lak tơbleăng ăm pêi pro nếo achê kố.

Dak Lak kô mơ’no lối 20 rơtal liăn vâ rak vế ƀă mơnhông mơdêk khôi túa lĕm tro chêng koăng, hneăng hơnăm 2022 – 2025

Ki nhên, tiô pơkâ pêi pro Pơkâ dêi Hô̆i đông kong pơlê vâ pêi pro mâu tơdroăng, má môi mê cho: pêi pro hên troăng pơtâng tối, tơbleăng, rak vế tơmeăm khoăng mơhno túa lĕm tro chêng koăng. Rêm hơnăm tơkŭm po vêh pro ki vâ iâ má môi 1 tơdroăng leh, leh tiô khôi hmâ vâi krâ nah dêi mâu hdroâng kuăn ngo tung kong pơlê ƀă tơdroăng rak vế chêng koăng. Hriăn plĕng, vêh pro, pro tơniăn lĕm, ti tăng mâu khôi túa ki ton, hnê ăm rơxông kơ’nâi ƀă mơdêk châ tơƀrê xúa mâu ƀai chêng koăng ton nah dêi hdroâng kuăn ngo Rơđế, M’nông tung tơdroăng rêh ối pơlê pơla.

A Sa Ly tơplôu ƀă tơbleăng