VOV4.Xơ Đăng - Hâi lơ 25/8, a cheăm Dak Phơi, tơring Lak, Khu ngăn mơhno túa lĕm tro Tơ’noăng ivá ƀă Ôm hyô kong pơlê Dak Lak tơrŭm ƀă Ƀơrô ngăn Mơhno túa lĕm tro tơring Lak ƀă Vi ƀan hnê ngăn cheăm Dak Phơi tơkŭm po ‘mâi mơnhông leh pro nhŏng o dêi mơngế Mnông Gar. Kố cho môi tung mâu tơdroăng cheăng tung tơdroăng tơkêa ‘rak vế ƀă mơdêk ki kơnía ‘na mơhno túa lĕm tro chêng koăng a kong pơlê Dak Lak” xua Tíu xiâm tơrŭm cheăng kong têa ê kong pơlê Jeollabuk-do, Hàn Quốc tŏng kum.

Pôa pơchâu pro mơdĭng ăm 2 ngế ki tơrŭm pro nhŏng o

Tơdroăng mơdĭng kố châ po a hngêi pôa Y Thiêng Cil a ƀuôn Jiê Yuk, cheăm Dak Phơi, tơring Lak, kong pơlê Dak Lak, tơrŭm pro nhŏng o ƀă pôa Y Nam Pan Ting rơtế ối tung môi to pơlê. Tiah mê, pôa Y Thiêng Cil prếi pôa Y Nam Pan Ting cho pú dêi rơpó sap ing hên hơnăm hdrối. Tơdroăng po kố châ pêi pro ing 5 tơdroăng, ƀă 2 tơdroăng tĭng cho xôi kâu ivá, tơbleăng ƀă xeăng ‘na tơdroăng tơrŭm pro nhŏng o pơla 2 péa rơpŏng ƀă tơdroăng ki pâ hmê tơrŭm pơla 2 rơpŏng châ tơrŭm pro nhŏng o.

Pôa pơchâu pro mơdĭng ăm 2 ngế ki tơrŭm pro nhŏng o

Tung plâ po leh, idrâp chêng Bor châ tŏn hơniâp ro, mâu droh rơtăm kơhnhon xuâng ƀai rơkâu ƀă châ hlo tơdroăng ki tơrŭm pro nhŏng o pơla péa rơpŏng. Klêi kơ’nâi mơdĭng kố, sap ing tíu ki tơdjuôm hdroâng hdrê, ôh tá ai tơrŭm tung inâi hdroâng hdrê, 2 rơpŏng chiâng nhŏng o môi hngêi, ai tơrŭm cheăng hmâ achê, tŏng kum dêi rơpó drêng pá, trâm xâu xía ôh tá chiâng riân dêi mâu tơdroăng ki tơná tŏng kum.

Katarina Nga tơplôu ƀă tơbleăng