A Tíu xối tơbâ tơnêi têa ki kal Hngêi kroăng phâk Ƀuôn Ma Thuột, Khu ngăn Mơhno túa lĕm tro, Tơ’noăng ivá ƀă Ôm hyô kong pơlê Dak Lak tơkŭm po mơnê mâu lêng kăch măng hiăng hlâ akố. Pôa Lại Đức Đại, kăn phŏ pơkuâ khu ngăn Mơhno túa lĕm tro, Tơ’noăng ivá ƀă Ôm hyô kong pơlê Dak Lak ăm ‘nâi: Sap ing hơnăm2019, Leh mơnê mâu lêng kăch măng a Hngêi phak Ƀuôn Ma Thuột hiăng chiâng tơdroăng cheăng ki châ tơkŭm po tiah hmâ, vâ kăn ƀô̆, đảng viên ƀă kuăn pơlê mâu hdroâng kuăn ngo tung kong pơlê mơhno tơdroăng ki pâ mơnê khât troh hnoăng cheăng kân kĭn dêi mâu lêng kŏng sản ki tro vâi ‘nêk mơ’nêa, hlâ rêh a Hngêi phâk Ƀuôn Ma Thuột.

Kố xuân hiăng chiâng tíu ki xiâm ăm kuăn pơlê ƀă tơmối tăng ‘nâi ‘na tơdroăng ton nah. Ing mê, hnê hriâm hiâm mơno, kal kí ‘na khôi hmâ kăch măng dêi khu lêng ƀă kuăn pơlê pin, veăng kum mơdêk hiâm mơno tơrŭm, môi hiâm mơno hâk tơngăm hdroâng mơngế rơtế mơ-eăm ivá mơjiâng pơlê cheăm, tơnêi têa rế hía rế hlê plĕng, kro mơdrŏng.