Kơxê lơ 13/1, tung chôu phut phiu ro tơdah Têt Lo hơnăm nếo Qúy Mão hơnăm 2023, Vi ƀan kong pơlê Dak Lak tơkŭm po “Leh mơgêi ƀă khĕn kơdeăn Ngế ki hnê pơtâp ivá, ƀă ngế tơ’noăng ivá rơkê tung lâp tơnêi têa rôh má 9 hơnăm 2022. Veăng tơ’noăng ivá kong pơlê Dak Lak ai lối 150 ngế tơ’noăng ivá, Ngế hnê pơtâp ivá veăng tơ’noăng a 14/43 tơdroăng. Klêi tơ’noăng, khu ki tơ’noăng châ kâ 13 Mê dái mêa, 9 Mê dai hâu ƀă 15 Mê dái hlái.

Tung mê ki tơxâng vâ tối ai 2 ngế ki tơ’noăng rơkê ó dêi tơnêi têa pin a môn têk tă, môn tơhrot kơxái châ ối má môi tung tâi tâng khu, ƀă ối má môi tung 20/65 to kong pơlê, pơlê kong kân, kơvâ cheăng tung lâp tơnêi têa.

A leh mơgêi, pôa Võ Văn Cảnh, Kăn phŏ hnê ngăn Vi ƀan kong pơlê Dak Lak hâk ro khu tơ’noăng ivá Dak Lak hiăng tơkâ luâ xơpá, pơloăng mơnúa tung pơla ai pơreăng tâ tú vâ pơtâp ivá, tơ’noăng châ tơƀrê. Rôh kố, Vi ƀan kong pơlê Dak Lak hiăng diâp ƀâng kơdeăn khĕn ăm 13 ngế hnê pơtâp ivá, 36 ngế tơ’noăng ivá ki hiăng châ kâ tung hriâm ƀă tơ’noăng a  Rôh tơ’noăng ivá lâp tơnêi têa  má 9 hơnăm 2022 kố nah.