VOV4.Xơ Đăng - Kơxo lơ 20/4, Khu pơtâng tối tơdroăng kal tiô troăng um tơvi, hyôh Internet kong pơlê Dak Lak po Hâi hlá mơ-éa ƀă tơdroăng ki rơkê tung pơchuât hlá mơ-éa hơnăm 2022. Sap ing nôkố troh tâi lơ 22/4, ‘’Hâi hlá mơ-éa ƀă tơdroăng ki rơkê tung pơchuât mơ-éa’’ po ƀă hên tơdroăng cheăng môi tiah: mơđah tơbleăng mâu mơ-éa tiô mâu inâi ‘na Hlá mơ-éa lĕm, hlá mơ-éa mâu hơnăm 2021 ƀă 2022; Hlá mơ-éa  mâu phô̆m vâ xông kân, mâu ngế ki chêh hlá mơ-éa Dak Lak, mâu tơdroăng kal dei kong pơlê; hlá mơ-éa lịch sử ƀă hlá mơ-éa ‘na pôa Hồ Chí Minh; Tơpui tơno, tơbleăng tối ngế ki chêh, hlá mơ-éa chêh ki nếo ƀă trâm mâ ƀă ngế ki chêh ƀă ngế ki pơchuât; Tơkŭm po Kơdrum hlá mơ-éa mâu phô̆m vâ xông kân ƀă mâu tơdroăng cheăng ki mơnúa ngăn tung pơlê pơla; tíu ki ‘măn hlá mơ-éa ukố umê; Veăng kum hlá mơ-éa, kế tơmeăm pơchuât hlá mơ-éa ăm vâi hdrêng kơtiê, kum mâu tíu ki ‘măn hlá mơ-éa kơpong hngế hngo, kơpong tíu tơkăng kong ƀă mâu ngế ki tŏng kum pơlê pơla.

Po Hâi hlá mơ-éa ƀă tơdroăng rơkê tung pơchuât hlá mơ-éa hơnăm 2022 a Dak Lak

Rơtế ƀă tơkŭm po a pơlê kong kơdrâm Ƀuôn Ma Thuột, mâu tíu pêi cheăng ối tơrŭm tơkŭm po mâu tơdroăng cheăng pêi pro Hâi hlá mơ-éa ƀă pơchuât a tơring Ea Hleo ƀă tơdroăng ki kal ƀă ai pơxúa.

Katarina Nga tơplôu ƀă tơbleăng

8.Môi ngế kăn pơkuâ cheăm Ea Nam, tơring Ea Hleo, kong pơlê Dak Lak mơnhên, môi tourbin on tơhrik kơtâu ƀă khía a cheăm tro chếo a kơxê măng lơ 19/4. Tơdroăng tơkêa Hngêi kơmăi on tơhrik kơtâu ƀă khía Ea Nam ai tâi tâng liăn ‘no lối 16.500 rơtal liăn, xua Kŏng ti tơlo liăn on tơhrik kơtâu ƀă khía Trung Nam Dak Lak pro ngế ki pơkuâ ‘no liăn pro. Kố xuân cho tơdroăng tơkêa on tơhrik kơtâu ƀă khía a kĭng kân má môi lâp tơnêi têa. A tơdroăng tơkêa kố, khu mơdró kâ hiăng mơjiâng troăng prôk krá kâk ai tơdjêp mâu trăng tourbin on tơhrik kơtâu ƀă khía, bê ăm rơxế ki vâ tơplâ on kơtâu, la rêm to trăng xŏn troh 130m, ôh tá chiâng vâ tơpâ on. Pôa Vũ Đình Tân, kăn pơkuâ KŎng ti Tơlo liăn ‘no cheăng mơjiâng pro Trung Nam ăm ‘nâi, tíu pêi cheăng kố dế séa ngăn ‘na kih tuât dêi on tơhrik klêi kơ’nâi trâm xía vâ ƀă tăng troăng ‘mâi rơnêu. Nôkố, khu mơdró kâ ối ai tŭm linh kiện, kế tơmeăm ki hbrâ , mê tăng tourbin ki nếo chếo kô rĕng châ ‘mâi rơnêu ƀă vêh mơ’no on tơhrik nếo.

Katarina Nga tơplôu ƀă tơbleăng